കൊച്ചി : സിനിമാ വ്യവസായവുമായി ബന്ധപ്പെട്ട ആദായ നികുതിയടവ് സംബന്ധിച്ച് അധികൃതര്‍ വിശദാംശങ്ങള്‍ പരിശോധിച്ചു തുടങ്ങി. സിനിമാ നിര്‍മാണ മെഖലയില്‍ കള്ളപ്പണം വിനിയോടിക്കുന്നുണ്ടോയെന്നത് സംബന്ധിച്ചാണ് കഴിഞ്ഞ ദിവസങ്ങളില്‍ തെരച്ചില്‍ നടത്തിയത്.
നടന്‍ മോഹന്‍ലാല്‍ ഉള്‍പ്പടെയുള്ള പ്രമുഖരില്‍ നിന്നും ഇതുസംബന്ധിച്ചുള്ള വിവരങ്ങള്‍ ആദായ നികുതി വകുപ്പ് ആരാഞ്ഞതായാണ് റിപ്പോര്‍ട്ടുകള്‍. ചലച്ചിത്ര പ്രവര്‍ത്തകരുടെ യഥാര്‍ഥ വരുമാനവും നികുതിയടവും തമ്മില്‍ പൊരുത്തപ്പെടുന്നുണ്ടോയെന്നും സിനിമാനിര്‍മാണ മേഖലയില്‍ കള്ളപ്പണം വിനിയോഗിക്കപ്പെടുന്നുണ്ടോയെന്നും ആദായ നികുതി വകുപ്പ് പരിശോധിക്കും.
കേന്ദ്ര ധനകാര്യ മന്ത്രാലയത്തിന്റെ പ്രത്യേക നിര്‍ദേശപ്രകാരമാണ് മലയാള ചലച്ചിത്ര പ്രവര്‍ത്തകരുടെ വീടുകളും സ്ഥാപനങ്ങളും ആദായനികുതി (ഐടി) വകുപ്പ് കഴിഞ്ഞ ദിവസങ്ങളില്‍ റെയ്ഡ് ചെയ്തത്. എന്നാല്‍ പരിശോധന സംബന്ധിച്ചുള്ള വിശദാംശങ്ങള്‍ പുറത്തുവിട്ടില്ല. മലയാളത്തിലെ മുന്‍നിര നിര്‍മാതാക്കളും നടീനടന്മാരും അന്വേഷണപരിധിയിലുണ്ടെന്നാണ് സൂചന. കേരളത്തിലെ സിനിമാ നിര്‍മാണങ്ങള്‍ക്കായി വിദേശപണ നിക്ഷേപം ഉപയോഗപ്പെടുത്തുന്നുണ്ടെന്ന ഇന്റലിജന്‍സ് വിവരത്തിന്റെ അടിസ്ഥാനത്തിലാണ് പരിശോധന വ്യാപകമാക്കിയത്.
പ്രതികരിക്കാൻ ഇവിടെ എഴുതുക: