തൃശൂര്‍ : പോളണ്ടില്‍ മലയാളി കുത്തേറ്റ് മരിച്ചു. തൃശ്ശൂര്‍ ഒല്ലൂര്‍ സ്വദേശി സൂരജ്(24)ആണ് പോളണ്ടില്‍ കുത്തേറ്റ് മരിച്ചത്. ജോര്‍ജിയന്‍ പൗരന്മാരുമായുള്ള തര്‍ക്കത്തിനിടെയാണ് സൂരജിന് കുത്തേല്‍ക്കുകയായിരുന്നു. ഒപ്പമുണ്ടായിരുന്ന നാല് മലയാളികള്‍ക്കും കുത്തേറ്റ് ചികിത്സയിലാണ്.
പോളണ്ടിലെ സ്വകാര്യ കമ്പനിയില്‍ സൂപ്പര്‍വൈസറായി ജോലി നോക്കുകയായിരുന്നു സൂരജ്. ഇതേ കമ്പനിയിലെ ജോര്‍ജിയന്‍ പൗരന്മാര്‍ അടുക്കള ഭാഗത്തുവെച്ച് സിഗരറ്റ് വലിക്കുന്നത് കണ്ട് ചിലര്‍ വിലക്കിയിരുന്നു. ഇതുമായി ബന്ധപ്പെട്ട് വാക്കുതര്‍ക്കം ഉടലെടുക്കുകയും ജോര്‍ജിയന്‍ പഗൗരന്മാര്‍ സൂരജ് ഉള്‍പ്പടെയുള്ളവരെ കത്തികൊണ്ട് ആക്രമിക്കുകയുമായിരുന്നു.
അതേസമയം സൂരജ് തര്‍ക്കത്തിനിടെ പിടിച്ചുമാറ്റാന്‍ പോയതാണെന്നും അതിനിടെ കുത്തേല്‍ക്കുകയായിരുന്നെന്നും പോളണ്ട് മലയാളി അസോസിയേഷന്‍ പ്രതിനിധികള്‍ അറിയിച്ചു. സംഭവത്തിന് ശേഷം ജോര്‍ജിയന്‍ പൗരന്മാര്‍ കെട്ടിടത്തില്‍നിന്ന് ഇറങ്ങിയോടിയെന്നാണ് വിവരം. കെട്ടിടം ഇപ്പോള്‍ പോലീസ് സീല്‍ ചെയ്തിരിക്കുകയാണെന്നുമാണ് വിവരം.
കഴിഞ്ഞദിവസവും മറ്റൊരു മലയാളി പോളണ്ടില്‍ കൊല്ലപ്പെട്ടിരുന്നു. പാലക്കാട് സ്വദേശിയും പോളണ്ടിലെ ഐഎന്‍ജി ബാങ്കില്‍ ഐടി എന്‍ജിനീയറുമായ എസ്. ഇബ്രാഹിമാണ് കഴിഞ്ഞദിവസം താമസസ്ഥലത്തുവെച്ച് കൊല്ലപ്പെട്ടത്. ഈ സംഭവത്തില്‍ പോളണ്ട് സ്വദേശിയായ എമില്‍ എന്നയാളെ പോലീസ് കസ്റ്റഡിയിലെടുത്തതായാണ് വിവരം.
