തിരുവനന്തപുരം : നിര്‍മാണ പ്രവര്‍ത്തനങ്ങളുമായി ബന്ധപ്പെട്ട തര്‍ക്കം സിഐടിയു ഭാരവാഹി സിപിഎം ബ്രാഞ്ച് സെക്രട്ടറിയെ കുത്തി പരിക്കേല്‍പ്പിച്ചു. കരിക്കകം ചാരുംമൂട് സിപിഎം ബ്രാഞ്ച് സെക്രട്ടറിയും ചാരുംമൂട് ശ്രീരാഗം റോഡ് സ്വദേശിയുമായ വരുണിനാണ് കുത്തേറ്റത്. സിഐടിയു കണ്‍വീനര്‍ അജയകുമാറിനെതിരേയാണ് പേട്ട പോലീസ് കേസെടുത്തത്.
ശനിയാഴ്ച വൈകീട്ടോടെയാണ് സംഭവം. വരുണും അജയകുമാറും ബന്ധുക്കളും അയല്‍വാസികളുമാണ്. അജയകുമാറിന്റെ വീട്ടില്‍ സെപ്റ്റിക് ടാങ്ക് നിര്‍മിക്കുന്നതുമായി ബന്ധപ്പെട്ട തര്‍ക്കമാണ് കത്തിക്കുത്തിലേക്ക് നീങ്ങിയത്.
അജയകുമാറിന്റെ ഭാര്യയെ വരുണ്‍ അസഭ്യം പറഞ്ഞെന്നായിരുന്നു ആരോപണം. ഇതറിഞ്ഞ അജയകുമാര്‍ കരിക്കകം വായനശാലയ്‌ക്ക് സമീപത്തുവെച്ച് കറിക്കത്തി ഉപയോഗിച്ച് വരുണിന്റെ വയറ്റില്‍ കുത്തുകയായിരുന്നു. വരുണിന്റെ പരിക്ക് ഗുരുതരമല്ലെന്നാണ് പോലീസ് പറയുന്നത്. സംഭവത്തിന് പിന്നാലെ അജയകുമാര്‍ ഒളിവിലാണ്. ഇരുവരും തമ്മില്‍ നേരത്തെ പാര്‍ട്ടിപരമായ തര്‍ക്കങ്ങളുണ്ടായിരുന്നെന്നും റിപ്പോര്‍ട്ടുണ്ട്.
പ്രതികരിക്കാൻ ഇവിടെ എഴുതുക: