ന്യൂദല്ഹി : മൂന്ന് വടക്കുകിഴക്കന് സംസ്ഥാനങ്ങളില് തെരഞ്ഞെടുപ്പ് പ്രഖ്യാപനം. ത്രിപുര, മേഘാലയ, നാഗാലാന്ഡ് എന്നീ സംസ്ഥാനങ്ങളിലെ നിയമസഭകളിലേക്കുള്ള തെരഞ്ഞെടുപ്പിന്റെ തിയ്യതിയാണ് തെരഞ്ഞെടുപ്പ് കമ്മിഷന് പ്രഖ്യാപിച്ചിരിക്കുന്നത്.
ഫെബ്രുവരി 16 നാണ് ത്രിപുരയിലെ വോട്ടെടുപ്പ്. മേഘാലയിലും നാഗാലാന്ഡിലും ഫെബ്രുവരി 27നും വോട്ടെടുപ്പ് നടക്കും. മൂന്ന് സംസ്ഥാനങ്ങളിലും മാര്ച്ച് 2നാണ് വോട്ടെണ്ണല്. ജനുവരി 30 ആണ് ത്രിപുരയില് നാമനിര്ദ്ദേശ പത്രിക നല്കേണ്ട അവസാന തിയതിയെന്നും തെരഞ്ഞെടുപ്പ് കമ്മിഷന് വാര്ത്താ സമ്മേളനത്തില് അറിയിച്ചു.
ഇതോടൊപ്പം ലക്ഷദ്വീപിലെ ലോക്സഭാ ഉപതെരഞ്ഞെടുപ്പ് തിയതിയും പ്രഖ്യാപിച്ചിട്ടുണ്ട്. ഫെബ്രുവരി 27നാണ് ലക്ഷദ്വീപിലെ ഉപതെരഞ്ഞെടുപ്പ്. ക്രിമിനല് കേസില് ശിക്ഷിക്കപ്പെട്ട് തെരഞ്ഞെടുപ്പ് കമ്മിഷന് മുഹമ്മദ് ഫൈസലിനെ അയോഗ്യനാക്കിയതിനെ തുടര്ന്നാണ് ഉപതെരഞ്ഞെടുപ്പ് പ്രഖ്യാപിച്ചിരിക്കുന്നത്.
തെരഞ്ഞെടുപ്പ് തിയ്യതി പ്രഖ്യാപിച്ചതോടെ മൂന്നിടത്തും മാതൃകാ പെരുമാറ്റ ചട്ടം നിലവില് വന്നു. മൂന്ന് സംസ്ഥാനങ്ങളിലുമായി 62.8 ലക്ഷം വോട്ടര്മാരാണ് പോളിംഗ് ബൂത്തിലേക്കെത്തുക. തിയ്യതി പ്രഖ്യാപനത്തിന് മുന്നോടിയായി മൂന്ന് സംസ്ഥാനങ്ങളിലെയും ഒരുക്കങ്ങള് നേരിട്ട് വിലയിരുത്തിയതായി ഇലക്ഷന് കമ്മീഷന് വാര്ത്താ സമ്മേളനത്തില് അറിയിച്ചു.
മൂന്ന് സംസ്ഥാനങ്ങളിലുമായി 9,125 പോളിങ് സ്റ്റേഷനുകള് തയ്യാറാക്കും. ഇവയില് 70% പോളിങ് സ്റ്റേഷനുകളിലും വെബ്കാസ്റ്റിംഗ് ഉണ്ടായിരിക്കും. വോട്ടര് ഐഡി കാര്ഡ് ഉള്പ്പെടെയുള്ള 12 തിരിച്ചറിയല് രേഖകള് ഉപയോഗിച്ച് ജനങ്ങള്ക്ക് വോട്ട് ചെയ്യാം. വ്യാജ വീഡിയോകള് തടയാന് പോളിങ് ബൂത്തിന് അകത്തും ബൂത്ത് നമ്പര് അടക്കമുളളവ രേഖപ്പെടുത്തുമെന്ന് തെരഞ്ഞെടുപ്പ് കമ്മീഷന് നിര്ദ്ദേശിച്ചു. വ്യാജ ദൃശ്യങ്ങള് പ്രചരിക്കുന്നത് തടയുന്നതിനാണ് ഈ സംവിധാനം.
