മികച്ച നടൻ, മികച്ച ചിത്രം എന്നീ വിഭാഗങ്ങളില്‍ ഓസ്കർ യോ​ഗ്യത പട്ടികയിൽ കാന്താര; അന്തിമ നോമിനേഷനിൽ കാന്താര എത്തുമോ?

2023-ലെ  ഇന്ത്യയിൽ നിന്നുള്ള ഓസ്കർ മത്സര പട്ടികയിൽ  കാന്താരയും ഇടം നേടി. മികച്ച ചിത്രം, മികച്ച നടൻ എന്നീ വിഭാഗങ്ങളിലാണ് മത്സര പട്ടികയിൽ കാന്തര ഇടം നേടിയിരിക്കുന്നത്.

ചിത്രം യോ​ഗ്യത പട്ടികയിൽ ഇടം നേടിയതിൽ സന്തോഷമുണ്ടെന്ന് നിർമ്മാതാക്കളായ ഹൊംബാളെ ഫിലിംസ് അറിയിച്ചു. ഇതോടെ പ്രധാന നോമിനേഷനിൽ കാന്താര എത്തുന്നതിനായി ഓസ്കർ അം​ഗങ്ങൾക്ക് വോട്ട് രേഖപ്പെടുത്താം.  

മികച്ച ചിത്രം, മികച്ച നടൻ  എന്നീ വിഭാഗങ്ങളില്‍ അന്തിമ നോമിനേഷനിൽ കാന്താര എത്തുമോയെന്ന് വൈകാതെ അറിയാം. ആർആർആറിലെ ‘നാട്ടു നാട്ടു’ എന്ന ഗാനം അവസാന പട്ടികയിൽ ഇടം നേടിയിട്ടുണ്ട്. മികച്ച ചിത്രം, മികച്ച സംവിധാനം, മികച്ച നടൻ, മികച്ച ദൃശ്യാവിഷ്‌കാരം എന്നീ വിഭാഗങ്ങളിലായാണ് ആർആർആർ മത്സരിച്ചത്…….

2022-ലെ അസുലഭ വിജയം സമ്മാനിച്ച ചിത്രമാണ് കാന്താര. കാടും മനുഷ്യനും സംസ്കാരവും തമ്മിലുള്ള അപൂര്‍വ്വ ബന്ധത്തിന്റെ കഥയാണ് ഈ സിനിമ പറയുന്നത്. 16 കോടി മുതൽ മുടക്കിൽ പുറത്തിറങ്ങിയ ചിത്രം 450 കോടിയോളമാണ് സ്വന്തമാക്കിയത്. സംവിധാനവും കഥയും അഭിനയവും കൈകാര്യം ചെയ്ത റിഷഭ് ഷെട്ടി രജനീകാന്ത് ഉള്‍പ്പെടെയുള്ളവരുടെ അഭിനന്ദനം ഏറ്റുവാങ്ങിയിരുന്നു.