ഗാന്ധിനഗര്‍: ഗുജറാത്തിലെ നിയമസഭാ തെരഞ്ഞെടുപ്പില്‍ ബിജെപി നേടിയ ഉജ്വല വിജയം അടുത്ത ലോക്സഭാ തെരഞ്ഞെടുപ്പില്‍ എന്താണ് സംഭവിക്കാന്‍ പോകുന്നത് എന്നതിന്റെ വ്യക്തമായ സൂചനയാണെന്ന് കേന്ദ്ര ആഭ്യന്തരമന്ത്രി അമിത് ഷാ.
ബിജെപിയെ തുടര്‍ച്ചയായി വിജയിപ്പിച്ചതിന്റെ പേരില്‍ ഗുജറാത്തിലെ അപകീര്‍ത്തിപ്പെടുത്താന്‍ ശ്രമിച്ച കോണ്‍ഗ്രസിനും ആം ആദ്മി പാര്‍ട്ടിക്കും സംസ്ഥാനത്തെ ജനങ്ങള്‍ മറുപടി നല്കി, ഗാന്ധിനഗറില്‍ വികസനപദ്ധതികള്‍ക്ക് തുടക്കം കുറിച്ച് സംസാരിക്കവെ അമിത് ഷാ പറഞ്ഞു. കപടവാഗ്ദാനങ്ങള്‍ നല്കുന്നവര്‍ക്കും ജാതിയുടെ പേരില്‍ വോട്ടു ബാങ്കുകളെ സൃഷ്ടിക്കാന്‍ ശ്രമിക്കുന്നവര്‍ക്കും എന്താണ് ലഭിക്കാന്‍ പോകുന്നത് എന്ന് ഗുജറാത്തിലെ ജനങ്ങള്‍ വ്യക്തമാക്കിക്കഴിഞ്ഞു.
നരേന്ദ്ര മോദിയെ അപമാനിക്കാന്‍ ശ്രമിച്ചാലും തിരിച്ചടിയെന്തെന്നും എല്ലാവര്‍ക്കും മനസിലായി. ഗുജറാത്തിലെ ഒറ്റപ്പെട്ട വിജയമല്ലത്. നരേന്ദ്ര മോദിയെ ഒരിക്കല്‍ക്കൂടി പ്രധാനമന്ത്രിയാക്കാന്‍ രാജ്യം തയാറെടുക്കുന്നതിന്റെ മുന്നൊരുക്കം കൂടിയായിരുന്നു. ഈ സന്ദേശം കശ്മീര്‍ മുതല്‍ കന്യാകുമാരി വരെ എത്തിക്കഴിഞ്ഞു, അമിത് ഷാ പറഞ്ഞു.
പ്രതികരിക്കാൻ ഇവിടെ എഴുതുക: