25 കോടി കൊയ്തും പ്രേക്ഷകരുടെ ഹൃദയം കവര്‍ന്നും ഉണ്ണി മുകുന്ദന്റെ ‘മാളികപ്പുറം’. കേരളത്തില്‍ തരംഗമായിരിക്കുകയാണ്.
ഫാന്‍റസിയും ഭക്തിയും നിറഞ്ഞുനില്‍ക്കുന്ന മാളികപ്പുറം തിയറ്ററുകളിൽ വലിയ തോതില്‍ പ്രേക്ഷകരെ ആകര്‍ഷിക്കുന്നു. മാളികപ്പുറം കേരളത്തിന് പുറത്തും രാജ്യത്തിന് പുറത്തും തിയറ്ററുകളില്‍ ഹൗസ്ഫുള്‍ ആയി ഓടുകയാണ്. നവോത്ഥാനചിന്താഗതിക്കാര്‍ സ്ത്രീപ്രവേശനമാണ് മാളികപ്പുറം ചര്‍ച്ച ചെയ്യുന്നതെന്ന വിമര്‍ശനം ഉയര്‍ത്താന്‍ ശ്രമിച്ചെങ്കിലും നിഷ്കളങ്കമായ ഭക്തിയുടെ ലഹരി അതെല്ലാം മായ്ച്ചുകളഞ്ഞിരിക്കുന്നു.
മലയാളത്തിന് പുറമെ മാളികപ്പുറം തമിഴ്, തെലുങ്ക്, കന്നഡ, ഹിന്ദി എന്നീ ഭാഷകളില്‍ ഡബ്ബ് ചെയ്തിറക്കുകയാണ്. തെലുങ്ക് പതിപ്പ് വിതരണം ചെയ്യുന്നത് അല്ലു അർജ്ജുന്റെ ഗീതാ ആർട്സ് ആണ്. തെലുങ്ക് പതിപ്പ് ജനുവരി 21-ന് റിലീസ് ചെയ്യുമെന്ന് ഇപ്പോള്‍ അറിയിപ്പ് വന്നിരിക്കുന്നു. ഇതോടൊപ്പം, നേരത്തെ ആന്ധ്രപ്രദേശിലും തെലുങ്കാനയിലും പുറത്തിറങ്ങിയ മലയാളം പതിപ്പിനും നല്ല സ്വീകരണം ലഭിക്കുന്നതായാണ് വാര്‍ത്തകള്‍. പ്രത്യേകിച്ചും മകരവിളക്ക് സീസണായതിനാല്‍ നല്ല പ്രതികരണം ചിത്രം തിയറ്ററുകളില്‍ ഉണ്ടാക്കുന്നു.
കല്യാണി എന്ന എട്ടു വയസ്സുകാരിയുടെയും അവളുടെ സൂപ്പർ ഹീറോ ആയ അയ്യപ്പന്റെയും കഥ പറയുന്ന ചിത്രം ഉണ്ണി മുകുന്ദന്‍ സൂപ്പര്‍ സ്റ്റാറായി മാറുന്നതിന്റെ ആദ്യപടിയാണ് എന്ന അഭിപ്രായവും വന്നുകഴിഞ്ഞു. എന്തായാലും ഉണ്ണിമുകുന്ദനെ സംബന്ധിച്ചിടത്തോളം 2022 ഒരു പിടി വിജയസിനിമകള്‍ സമ്മാനിച്ചിരിക്കുകയാണ്. മനോജ് കെ ജയൻ, സൈജു കുറുപ്പ്, രമേശ് പിഷാരടി, സമ്പത്ത് റാം, ആൽഫി പഞ്ഞിക്കാരൻ എന്നിവരുടെ മികച്ച പ്രകടനം ചിത്രത്തിന് മുതല്‍ക്കൂട്ടാണ്. ഛായാഗ്രഹണം-വിഷ്ണുനാരായണൻ, എഡിറ്റിംഗ്-ഷമീർ മുഹമ്മദ്, സംഗീതം,പശ്ചാത്തല സംഗീതം- രഞ്ജിൻ രാജ്.
ഡിസംബര്‍ 30-ന് റിലീസ് ചെയ്ത മാളികപ്പുറം, ഇതിനോടകം 25 കോടി ക്ലബിൽ ഇടം നേടി. ഉണ്ണി മുകുന്ദന്റെ കരിയറിലെ തന്നെ ഏറ്റവും വലിയ വിജയത്തിലേയ്‌ക്കാണ് മാളികപ്പുറം പടി കയറുന്നത്. സണ്‍ഡേ ബോക്സ്ഓഫീസില്‍ രാജ്യത്തെ തന്നെ ടോപ്പ് ലിസ്റ്റിലും ചിത്രം ഇടം നേടിയിരുന്നു. നവാഗതനായ വിഷ്ണു ശശി ശങ്കറാണ് സംവിധാനം. അഭിലാഷ് പിള്ളയുടേതാണ് തിരക്കഥ.
പ്രതികരിക്കാൻ ഇവിടെ എഴുതുക: