തിരുവനന്തപുരം: കോഴിക്കോട് നടക്കുന്ന സംസ്ഥാന സ്കൂള് കലോത്സവത്തില് വെജിറ്റേറിയന് ഭക്ഷണം വിളമ്പുന്നതിനെതിരേ പാചക ചുമതലയുള്ള പഴയിടം മോഹന് നമ്പൂതിരിക്കെതിരേ 24 ന്യൂസിലെ മുന് മാധ്യമപ്രവര്ത്തകന് അരുണ്കുമാര്. ഭൂരിപക്ഷം കുട്ടികളും നോണ്വെജിറ്റേറിയന് ആണെന്നും നടക്കുന്നത് പ്രസാദമൂട്ടല്ല, ഭക്ഷണപ്പുരയാണെന്നും അരുണ് ഫേസ്ബുക്കില് കുറിച്ചു.
പോസ്റ്റിന്റെ പൂര്ണരൂപം-
ജാതി പ്രവര്ത്തിക്കുന്നത് ശുദ്ധി അശുദ്ധി ബോധ്യങ്ങളിലൂടെയാണ്. ചിലപ്പോഴൊക്കെ അത് വേഷം മാറി സുരക്ഷിതവെജിറ്റേറിയന് ഭക്ഷണം എന്ന രൂപത്തില് എത്താറുണ്ട്. ഭൂരിപക്ഷം കുട്ടികളും നോണ് വെജ് ആയ കലോത്സവത്തിന് ഈ വെജിറ്റേറിയന് ഫണ്ടമെന്റലിസം ജാതി വിശ്വാസത്തിന്റെ പ്രതിഫലനമാണ്. ഈ സീനൊക്കെ അവസാനിപ്പിക്കേണ്ട കാലമായി. നല്ല കോയിക്കോടന് രുചി കൊടുത്താണ് താത്പര്യമുള്ള കുട്ടികളെ തിരിച്ചയയ്ക്കേണ്ടത്. ഇത് പ്രസാദമൂട്ടല്ല, കലോത്സവ ഭക്ഷണപ്പുരയാണ്. നവോത്ഥാനം തോല്ക്കുന്നത് ഇങ്ങനെയൊക്കെയാണ്. സവര്ണ്ണന് ദേഹണ്ഡപുരയില് എത്തുന്നതല്ല, നാനാതരം രുചിഭേദങ്ങളുംആഘോഷപൂര്വ്വം വിതരണം ചെയ്യപ്പെടുമ്പോഴും രുചി വൈവിധ്യത്തില് ശുദ്ധികലര്ത്താതിരിക്കുമ്പോഴുമാണ് അത് വിജയിക്കുന്നത്.
