കൊച്ചി: ദേശീയ അവാര്‍ഡുകള്‍ വാരിക്കൂട്ടിയ വലിയ ചിറകുള്ള പക്ഷികള്‍, പേരറിയാത്തവര്‍, വീട്ടിലേക്കുള്ള വഴി തുടങ്ങിയ സിനിമകളുടെ സംവിധായകനായ ഡോ. ബിജുവിന്റെ പുതിയ ചിത്രത്തില്‍ ടൊവിനോ നായകന്‍. അദൃശ്യജാലകങ്ങള്‍ എന്ന് പേരിട്ട ഈ സിനിമയില്‍ ടൊവിനോ എന്ന അഭിനേതാവിനെയാണ് ഡോ. ബിജു കണ്ടെടുക്കുന്നത്.
അദൃശ്യജാലകങ്ങളുടെ ഫസ്റ്റ് ഗ്ലിംപ്സ് കഴിഞ്ഞ ദിവസം പുറത്തിറങ്ങിയപ്പോള്‍ തന്നെ ഈ സിനിമ ചര്‍ച്ചാവിഷയമായിക്കഴിഞ്ഞു. ടൊവിനോയുടെ മികച്ച അഭിനയമുഹൂര്‍ത്തങ്ങള്‍ സിനിമയില്‍ പ്രതീക്ഷിക്കാമെന്നതിന്റെ നേര്‍സാക്ഷ്യമാണ് അദൃശ്യജാലകങ്ങളുടെ പോസ്റ്റര്‍.
പ്രത്യേക മുഖഭാവങ്ങളോടെയാണ് ടൊവീനോ പ്രത്യക്ഷപ്പെടുന്നത്. ടൊവിനോ തന്നെയാണ് തന്റെ മൂന്ന് പോസ്റ്ററുകള്‍ ഫസ്റ്റ് ഗ്ലിംപ്സ് എന്ന പേരില്‍ ഇന്‍സ്റ്റഗ്രാമില്‍ പങ്കുവെച്ചിരിക്കുന്നത്. ഇതുപോലെ ഒരു സിനിമയുടെ ഭാഗമാകാന്‍ കഴിഞ്ഞതില്‍ സന്തോഷമുണ്ടെന്നും ടൊവീനോ കുറിച്ചു.
ഈ സിനിമയില്‍ ടൊവിനോയുടെ കഥാപാത്രത്തിന് പേരില്ല. നമുക്ക് ചുറ്റുമുള്ള നിരവധി പേരില്ലാത്തവരെ പ്രതിനിധീകരിക്കുന്ന സര്‍റിയലിസത്തില്‍ വേരൂന്നിയ സിനിമയാണ് ഇതെന്ന് പറയുന്നു.
എലനാര്‍ ഫിലിംസും മൈത്രി മൂവീസുമാണ് നിര്‍മ്മാതാക്കള്‍. പരമ്പരാഗത ശൈലിയില്‍ നിന്നും മാറി നില്‍ക്കുന്ന ഇത്രയും മൂല്യവത്തായ ചിത്രത്തിന് വേണ്ടി ഒന്നിച്ച അദൃശ്യജാലകങ്ങളുടെ മുഴുവന്‍ ക്രൂവിനെയും ഹൃദയത്തോടെ ചേര്‍ക്കുന്നുവെന്നും ടൊവീനോ എഴുതുന്നു. ഇന്‍സ്റ്റഗ്രാമില്‍ ഒട്ടേറെ പ്രതികരണങ്ങളാണ് ടൊവിനോയ്‌ക്ക് ലഭിക്കുന്നത്.
പ്രതികരിക്കാൻ ഇവിടെ എഴുതുക: