തിരുവനന്തപുരം: തിരുവനന്തപുരം നഗരസഭ വനിതാ കൗണ്‍സിലര്‍മാര്‍ക്കെതിരെ സ്ത്രീവിരുദ്ധ പരാമര്‍ശം നടത്തിയ മരാമത്ത് സ്റ്റാന്‍ഡിംഗ് കമ്മിറ്റി ചെയര്‍മാന്‍ ഡിആര്‍ അനിലിനെതിരെ നടപടിയെടുക്കണമെന്ന് ബിജെപി സംസ്ഥാന അദ്ധ്യക്ഷന്‍ കെ.സുരേന്ദ്രന്‍. അദ്ദേഹം രാജിവെക്കാന്‍ തയ്യാറായില്ലെങ്കില്‍ പുറത്താക്കണം.
സ്ത്രീകളെ അവഹേളിച്ച ഡിആര്‍ അനിലിനെതിരെ പൊലീസ് കേസെടുത്ത് അറസ്റ്റ് ചെയ്യണം. മുമ്പ് ഡെപ്യൂട്ടി മേയറും വനിതാ കൗണ്‍സിലര്‍മാര്‍ക്കെതിരെ ലൈംഗികാധിക്ഷേപം നടത്തിയിരുന്നു. ഇടതുപക്ഷത്തിന്റെ സ്ത്രീവിരുദ്ധ സമീപനത്തിന്റെ ഉദ്ദാഹരണമാണ് തിരുവനന്തപുരം കോര്‍പ്പറേഷനെന്നും കെ.സുരേന്ദ്രന്‍ പറഞ്ഞു.
മേയറുടെ നേതൃത്വത്തില്‍ നടന്ന പിന്‍വാതില്‍ നിയമനങ്ങള്‍ക്കും അഴിമതിക്കുമെതിരെ പ്രതിഷേധിച്ച ഒന്‍പത് ബിജെപി കൗണ്‍സിലര്‍മാര്‍ക്കെതിരെ നടപടിയെടുത്തത് ജനാധിപത്യവിരുദ്ധമാണ്. സിപിഎമ്മിന്റെ ഫാസിസ്റ്റ് സമീപനമാണ് ഈ നടപടിയിലൂടെ വ്യക്തമായിരിക്കുന്നത്.
സത്യപ്രതിജ്ഞാലംഘനം നടത്തിയ മേയര്‍ക്കെതിരെയാണ് നടപടിയെടുക്കേണ്ടത്. നഗരസഭ ഭരണ സമിതി പിരിച്ചുവിടുകയാണ് വേണ്ടത്. സസ്‌പെന്‍ഷന്‍ നടപടികള്‍ക്ക് മുമ്പില്‍ ബിജെപി മുട്ടുമടക്കില്ല. സമരം കൂടുതല്‍ ശക്തമാക്കുമെന്നും കെ.സുരേന്ദ്രന്‍ പറഞ്ഞു.
പ്രതികരിക്കാൻ ഇവിടെ എഴുതുക: