കൊച്ചി: നിലക്കല് മുതല് പമ്പ വരെ റോഡിരികില് വാഹനങ്ങള് പാര്ക്ക് ചെയ്യുന്നതിന് ഹൈക്കോടതി വിലക്ക് ഏര്പ്പെടുത്തി. തീര്ത്ഥാടകരുടെ ഗതാഗതം സുഗമമാക്കുന്നതിനാണ് ഇത്. ജസ്റ്റിസ് അനില് കെ. നരേന്ദ്രന് അധ്യക്ഷനായ ഡിവിഷന് ബെഞ്ചിന്റെതാണ് ഉത്തരവ്.
പമ്പ പോലീസ് സ്റ്റേഷനിലെ ഉദ്യോഗസ്ഥര് ഇക്കാര്യം ഉറപ്പാക്കാനും ഹൈക്കോടതി ആവശ്യപ്പെട്ടിട്ടുണ്ട്. ഇതുസംബന്ധിച്ച് വെള്ളിയാഴ്ചയ്ക്കകം റിപ്പോര്ട്ട് സമര്പ്പിക്കാനും കോടതി സ്പെഷല് കമ്മിഷണറോട് ആവശ്യപ്പെട്ടിട്ടുണ്ട്.
പാര്ക്കിങ് വിലക്ക് നടപ്പാക്കാന് എന്തൊക്കെ നടപടി സ്വീകരിച്ചുവെന്നത് സംബന്ധിച്ചാണ് ദേവസ്വം കമ്മിഷണര് റിപ്പോര്ട്ട് നല്കേണ്ടത്. ഇതിന് മുമ്പും തീര്ത്ഥാടന കാലയളവില് ശബരിമല മുതല് പമ്പ വരെ വാഹനങ്ങള് പാര്ക്ക് ചെയ്യുന്നതിന് ഹൈക്കോടതി വിലക്ക് ഏര്പ്പെടുത്തിയിരുന്നു.
