കോട്ടയം: മാങ്ങാനത്ത് ഷെൽട്ടർ ഹോമിൽ നിന്നും കാണാതായ ഒന്പത് പെണ്കുട്ടികളെയും കണ്ടെത്തി. എറണാകുളത്തെ ഇലഞ്ഞിയില് നിന്നാണ് ഇവരെ കണ്ടെത്തിയത്. സംഘത്തിലുണ്ടായിരുന്ന ഒരു കുട്ടിയുടെ ബന്ധുവീട്ടിലായിരുന്നു പെണ്കുട്ടികള്. സ്വന്തം ഇഷ്ടപ്രകാരമാണ് പോയതെന്ന് അവര് പോലീസിനോട് പറഞ്ഞു.
മാങ്ങാനത്ത് മഹിളാ സമഖ്യ എന്ജിഒ നടത്തുന്ന സ്വകാര്യ ഷെല്ട്ടര് ഹോമില് നിന്നാണ് പോക്സോ കേസിലെ അതിജീവിത അടക്കമുള്ള പെണ്കുട്ടികള് ചാടിപ്പോയത്. പുലര്ച്ചെ അഞ്ചരയോടെ ജീവനക്കാര് വിളിച്ചുണര്ത്താന് ചെന്നപ്പോഴാണ് കുട്ടികള് കടന്നുകളഞ്ഞതായി മനസിലായത്. തുടര്ന്ന് പൊലീസില് പരാതി നല്കുകയായിരുന്നു.
പോക്സോ കേസുകളില് അകപ്പെടുന്നവരും കുടുംബ പ്രശ്നങ്ങളുള്ളവരുമായ പന്ത്രണ്ടോളം പെണ്കുട്ടികളാണ് ഇവിടെ താമസിക്കുന്നത്. ഷെല്ട്ടര് ഹോമിന് ശിശുക്ഷേമ സമിതിയുടെ അംഗീകാരമുണ്ട്. കഴിഞ്ഞ കുറച്ചുനാളുകളായി ഇവിടെ പ്രതിഷേധങ്ങള് നടക്കുന്നതായി റിപ്പോര്ട്ടുകളുണ്ട്.
