തിരുവനന്തപുരം: കേരള സംസ്ഥാന ചലച്ചിത്ര അക്കാദമി ഡിസംബര് 9 മുതല് 16 വരെ തിരുവനന്തപുരത്ത് സംഘടിപ്പിക്കുന്ന 27-ാമത് ഐഎഫ്എഫ്കെയുടെ ഡെലിഗേറ്റ് രജിസ്ട്രേഷന് മികച്ച പ്രതികരണം. രജിസ്ട്രേഷന് തുടങ്ങി മണിക്കൂറുകള്ക്കകം തന്നെ 5000ത്തില്പ്പരം പേര് പ്രതിനിധികളായി രജിസ്റ്റര് ചെയ്തു. വിദ്യാര്ഥി വിഭാഗത്തിന് 3000 പാസ് അനുവദിച്ചിട്ടുണ്ട്. www.iffk.in എന്ന വെബ്സൈറ്റില് നല്കിയിട്ടുള്ള ലിങ്കിലൂടെ ഡെലിഗേറ്റ് രജിസ്ട്രേഷന് നടത്താം.
പൊതുവിഭാഗത്തിന് 1000 രൂപയും വിദ്യാര്ഥികള്ക്ക് 500 രൂപയുമാണ് ഡെലിഗേറ്റ് ഫീസ്. മേളയുടെ മുഖ്യവേദിയായ ടാഗോര് തിയേറ്ററില് സജ്ജീകരിച്ചിട്ടുള്ള ഡെലിഗേറ്റ് സെല് മുഖേന നേരിട്ടും രജിസ്ട്രേഷന് നടത്താം. സംസ്ഥാനത്തെ അക്ഷയ കേന്ദ്രങ്ങള് വഴിയും ഓണ്ലൈന് ഡെലിഗേറ്റ് രജിസ്ട്രേഷന് ചെയ്യാം.
