കാഞ്ഞങ്ങാട്: അജാനൂര്‍ പഞ്ചായത്തില്‍ സിപിഎമ്മിന്റെ ഉരുക്കുക്കോട്ടയെന്ന് വിശേഷിപ്പിക്കുന്ന അടോട്ട്, വെള്ളിക്കോത്ത് പ്രദേശത്ത് നിന്ന് നിരവധി പ്രവര്‍ത്തകരും അനുഭാവികളും പാര്‍ട്ടി കുടുംബങ്ങളും സിപിഎം വിടുന്നു.
പാര്‍ട്ടിയുടെ മുന്‍ ജില്ലാ കമ്മറ്റിയംഗവും ഇപ്പോള്‍ കാഞ്ഞങ്ങാട് ഏരിയാ കമ്മറ്റി അംഗവുമായ സിപിഎം നേതാവിന്റെ മകന്റെ നിരന്തരമായ ഉപദ്രവത്തിലും ഭീഷണിയിലും നാട്ടിലെ സാധാരണക്കാരായ പാര്‍ട്ടി പ്രവര്‍ത്തകര്‍ക്കും കച്ചവടക്കാര്‍ക്കും മറ്റു തൊഴിലാളികള്‍ക്കും ജീവിക്കാനാവാത്ത അവസ്ഥയാണ് നിലവിലുള്ളതെന്നാണ് ആരോപണം. ഇതിനെ തുടര്‍ന്നാണ് പാര്‍ട്ടിയുടെ സജീവപ്രവര്‍ത്തകരുള്‍പ്പെടെ സിപിഎം വിടാനൊരുങ്ങുന്നത്.
പാര്‍ട്ടി കുടുംബമായ തയ്യല്‍ തൊഴിലാളി താനത്ത് വളപ്പില്‍ ഗോപിയും കുടുംബവും ഇന്ന് അനുഭവിച്ചുകൊണ്ടിരിക്കുന്ന യാതനകള്‍ ഒരു ഉദാഹരണം മാത്രമാണ്. രാത്രി കാലങ്ങളില്‍ ഇരുചക്ര വാഹനങ്ങളില്‍ യാത്ര ചെയ്യുന്നവരെ പിന്‍തുടര്‍ന്ന് അക്രമിക്കുന്നതും തുടര്‍ക്കഥയായിരിക്കുകയാണ്. നാട്ടുകാരും പാര്‍ട്ടി പ്രവര്‍ത്തകരും നിരവധി തവണ പരാതികള്‍ നേതൃത്വത്തിന് നല്‍കിയെങ്കിലും യാതൊരുവിധ നടപടികളുമെടുക്കാതെ പാര്‍ട്ടിയുടെ മൗനാനുവാദത്തോടെ അക്രമം തുടരുകയാണ്.
നേതൃത്വത്തിന്റെ ഈ നിലപാടില്‍ പ്രതിഷേധിച്ച് അക്രമത്തിന് ഇരയായവരും ഇരയായി കൊണ്ടിരിക്കുന്ന പാര്‍ട്ടി കുടുംബങ്ങളും പ്രവര്‍ത്തകരും അനുഭാവികളുമാണ് സിപിഎം ബന്ധം അവസാനിപ്പിക്കാന്‍ തീരുമാനിച്ചിട്ടുള്ളത്.
പ്രതികരിക്കാൻ ഇവിടെ എഴുതുക: