കാസര്‍കോട്: പതിമൂന്ന് മാസത്തിലേറെയായി മലബാര്‍ മേഖലയിലെ ക്ഷേത്ര സ്ഥാനീകര്‍ക്ക് നല്‍കി വരുന്ന പ്രതിമാസ വേതനം അടിയന്തിരമായി നല്‍കണമെന്ന് ബിജെപി സംസ്ഥാന സെക്രട്ടറി അഡ്വ.കെ.പി പ്രകാശ് ബാബു ആവശ്യപ്പെട്ടു. തുച്ഛമായ 1400 രൂപ സര്‍ക്കാര്‍ നിര്‍ത്തിവെച്ച് സ്ഥാനീകരെ ബുദ്ധിമുട്ടിക്കുകയാണ്.
മറ്റ് വിഭാഗത്തിലെ ആളുകള്‍ക്ക് വേതനവും പെന്‍ഷനും വാരിക്കോരി നല്‍കുമ്പോഴും സംഘടിത ശക്തി അല്ലാത്ത ആചാര സ്ഥാനികര്‍ക്ക് നേരെ സര്‍ക്കാര്‍ മുഖം തിരിക്കുന്നത് അങ്ങേയറ്റം പ്രതിഷേധാര്‍ഹമാണ്. അതോടൊപ്പം 2016ന് ശേഷം മരണമടഞ്ഞ സ്ഥാനീകരുടെ അനന്തരവകാശിയായി ചുമതലപ്പെടുന്ന സ്ഥാനികരുടെ പുതിയ അപേക്ഷ സ്വീകരിക്കുന്നില്ലായെന്നതും സര്‍ക്കാര്‍ കാണിക്കുന്ന അവഗണനയുടെ നേര്‍സാക്ഷ്യമാണ്. സര്‍ക്കാര്‍ അടിയന്തിരമായി വേതനം ലഭ്യമാക്കിയിട്ടില്ലെങ്കില്‍ സ്ഥാനികരെ ചേര്‍ത്ത് നിര്‍ത്തി അവകാശ സംരക്ഷണത്തിനായി സമരത്തിനിറങ്ങുമെന്ന് കെ.പി. പ്രകാശ് ബാബു പറഞ്ഞു.
