തിരുവനന്തപുരം : ഷാരോണ് കൊലക്കേസിലെ പ്രതികളെ ഇന്ന് നെയ്യാറ്റിന്കര മജിസ്ട്രേറ്റ് കോടതിയില് ഹാജരാക്കും. മുഖ്യപ്രതി ഗ്രീഷ്മയുടെ അമ്മ സിന്ധു, അമ്മാവന് നിര്മ്മല് കുമാര് എന്നിവരെയാണ് ഹാജരാക്കുന്നത്. പ്രതികളെ കസ്റ്റഡിയില് കിട്ടാന് പോലീസ് അപേക്ഷ നല്കിയിട്ടുണ്ട്. കസ്റ്റഡിയിലെടുത്ത് വിശദമായി ചോദ്യം ചെയ്യാനാണ് തീരുമാനം.
അതേസമയം അന്വേഷണ ഉദ്യോഗസ്ഥനായ ജില്ലാ ക്രൈംബ്രാഞ്ച് ഡിവൈഎസ്പി ജോണ്സണോടും ഇന്ന് കോടതിയില് ഹാജരാകാന് ആവശ്യപ്പെട്ടിട്ടുണ്ട്. കൂടാതെ ആശുപത്രിയില് നിന്നും ജയിലേക്ക് മാറ്റിയ ഗ്രീഷ്മയെ കസ്റ്റഡിയില് വിട്ടുകിട്ടാനും പോലീസ് അപേക്ഷ നല്കും. ഷാരോണ് കേസിന്റെ തുടരന്വേഷണം തമിഴ്നാട്ടിലേക്ക് മാറ്റുന്നതാകും ഉചിതമെന്ന നിയമോപദേശം റൂറല് എസ്പി ഇന്ന് ഡിജിപിക്ക് കൈമാറും. ഉന്നത ഉദ്യോഗസ്ഥരും നിയമവിദഗ്ധരുമായുള്ള കൂടിയാലോചനയ്ക്ക് ശേഷം കേസ് കൈമാറുന്നതിനെ കുറിച്ച് റിപ്പോര്ട്ട് ഡിജിപി ആഭ്യന്തര സെക്രട്ടറിക്ക് കൈമാറും.
കേസിന് ആസ്പദമായ സംഭവം നടക്കുന്നത് തമിഴ്നാട് അതിര്ത്തിക്ക് സമീപത്ത് ആയതിനാല് അന്വേഷണത്തിന്റെ അധികാര പരിധി സംബന്ധിച്ച് സംശയമുള്ളതിനാലാണ് റൂറല് എസ്പി നിയമോപദേശം തേടിയിട്ടുണ്ട്. ഷാരോണിനിനെ കൊലപ്പെടുത്താന് ഗ്രീഷ്മയും മറ്റ് പ്രതികളും ചേര്ന്ന് ഗൂഢാലോചന നടത്തിയതും വിഷം വാങ്ങി കൊടുത്തതും തെളിവ് നശിപ്പിച്ചതും തമിഴ്നാട്ടിലാണ്. എന്നാല് ഷാരോണിന്റെ മരണം സംഭവിച്ചിരിക്കുന്നത് തിരുവനന്തപുരം മെഡിക്കല് കോളജ് ആശുപത്രിയിലാണ്.
നിലവില് പാറശാല പോലീസാണ് കേസെടുത്ത് അന്വേഷണം നടത്തി വരുന്നത്. വിചാരണയിലേക്ക് പോകുമ്പോള് അന്വേഷണ പരിധി പ്രതികള് ചോദ്യം ചെയ്താല് കേസിനെ ഇത് ബാധിച്ചേക്കാം. അതിനാല് തുടരന്വേഷണം തമിഴ്നാട് പോലീസിന് കൈമാറുന്നതാണ് അഭികാമ്യമെന്നാണ് ജില്ലാ പബ്ലിക് പ്രോസിക്യൂട്ടറുടെ നിയമോപദേശം. എന്നാല് അന്വേഷണം കൈമാറരുതെന്നാണ് ഷാരോണിന്റെ കുടുംബം ആവശ്യപ്പെടുന്നത്. ഇത് സംബന്ധിച്ച് മുഖ്യമന്ത്രിയെ കണ്ടും ഷാരോണിന്റെ പിതാവ് ആവശ്യപ്പെട്ടിരുന്നു.
