ന്യൂദല്ഹി:ബോളിവുഡ് നടി കങ്കണ റണാവത്തിനെ ബിജെപിയിലേക്ക് സ്വാഗതം ചെയ്ത് ദേശീയ അദ്ധ്യക്ഷൻ ജെപി നദ്ദ.തുറന്ന ബിജെപി അനുകൂലനിലപാടിലൂടെ ശ്രദ്ധേയയാവുകയും ബിജെപി വിരുദ്ധരെ വിറളിപിടിപ്പിക്കുകയും ചെയ്ത ബോളിവുഡ് താരം കങ്കണ റണാവത്ത് കഴിഞ്ഞ ദിവസം ബിജെപിയില് പ്രവേശിക്കുന്നതിനെക്കുറിച്ച് ആഗ്രഹം പ്രകടിപ്പിച്ചിരുന്നു. .
“കങ്കണ റണാവത്ത് പാർട്ടിയിൽ ചേരുന്നത് സ്വാഗതം ചെയ്യുന്നു. തെരഞ്ഞെടുപ്പിൽ മത്സരിക്കുന്നത് എന്റെ മാത്രം തീരുമാനമല്ല. താഴെത്തട്ടിൽ നിന്ന് ഒരു കൂടിയാലോചന പ്രക്രിയയുണ്ട്. തെരഞ്ഞെടുപ്പ് കമ്മറ്റി മുതൽ പാർലമെന്ററി ബോർഡ് വരെ”- ജെ.പി. നദ്ദ പറഞ്ഞു. 2024ലെ ലോക്സഭാ തെരഞ്ഞെടുപ്പില് ജനങ്ങള് ആവശ്യപ്പെടുകയാണെങ്കില് ഹിമാചല് പ്രദേശിലെ മണ്ഡിയില് നിന്നും മത്സരിക്കാന് തയ്യാറാണെന്നുമുള്ള കങ്കണ റണാവത്ത് കഴിഞ്ഞ ദിവസം നടത്തിയ പ്രസ്താവനയോട് പ്രതികരിക്കുകയായിരുന്നു ജെ.പി. നദ്ദ.
“എല്ലാവരേയും ബിജെപിയിലേക്ക് സ്വാഗതം ചെയ്യുന്നു. എന്നാൽ ഏത് പദവിയിലാണ് അവരെയെല്ലാം ഉൾപ്പെടുത്തേണ്ടതെന്ന് പാർട്ടിയാണ് തീരുമാനിക്കുന്നത്. ഞങ്ങൾ ആരെയും ഉപാധികളാൽ എടുക്കില്ല. ഞങ്ങൾ എല്ലാവരോടും പറയുന്നു, നിങ്ങൾ നിരുപാധികമായി വരണം, അതിനുശേഷം മാത്രമേ പാർട്ടി തീരുമാനിക്കൂ”- അദ്ദേഹം കൂട്ടിച്ചേർത്തു.
