പത്തനംതിട്ട: പത്തുവര്ഷം മുന്പ് കാണാതായ പന്തളം സ്വദേശിനി സിമികുമാരി(42) എന്ന യുവതിയെ മലപ്പുറത്ത് കണ്ടെത്തി. ഇവര് ലവ് ജിഹാദിന്റെ ഇരയാണെന്ന് അന്വേഷണത്തില് കണ്ടെത്തി.
പത്ത് വര്ഷം മുന്പാണ് സിമികുമാരിയെ കാണാനില്ലെന്ന പരാതിയില് പന്തളം പൊലീസ് കേസെടുത്തത്. പന്തളം എസ്ഐ എസ്. ശ്രീകുമാറിന്റെ നേതൃത്വത്തില് നടന്ന അന്വേഷണത്തിനൊടുവിലാണ് സിമികുമാരിയെ മലപ്പുറത്ത് കണ്ടെത്തിയത്.
2012 മെയ് ആറിന് രാവിലെ മുതലാണ് സിമികുമാരിയെ കാണാതായത്. പ്രാഥമിക അന്വേഷണങ്ങളില് കണ്ടെത്താതിരുന്നതിനെ തുടര്ന്ന് തെളിയാത്ത കേസുകളുടെ പട്ടികയില് ഈ കേസും ഉള്പ്പെടുത്തി. സിമിയോടൊപ്പം രണ്ട് മക്കളില് മകളെയും കാണാതായിരുന്നു. മകനെ അച്ഛനൊപ്പം വിട്ടാണ് സിമി കാമുകനൊപ്പം പോയത്. ഈയിടെയാണ് പെരിന്തല്മണ്ണയിലെ സൂപ്പര് മാര്ക്കറ്റില് ജോലി ചെയ്യുന്ന സിമിയെ കണ്ടെത്തിയത്.
ലവ് ജിഹാദിന് ഇരയായ സിമി ഇപ്പോള് സാനിയ
ഹരിപ്പാട് സ്വദേശിയായ ഹന്സില് (38) എന്ന കാമുകനാണ് സിമിയെ വശത്താക്കിയത്. പന്തളത്തെ ഒരു സ്വകാര്യസ്ഥാപനത്തില് ജോലി ചെയ്യുന്നതിനിടയിലാണ് സിമി ഹന്സിലുമായി അടുത്ത്. പിന്നീല് ഹന്സില് സിമിയുമായി മലപ്പുറത്തേക്ക് കടന്നു. പിന്നീട് സിമിയെ മതം മാറ്റി സാനിയ ആക്കി. ഹന്സിലുമായി ഒമ്പത് വര്ഷത്തോളം ഒന്നിച്ച് ജീവിച്ചെങ്കിലും പിന്നീട് രണ്ട് പേരും കുടുംബപ്രശ്നങ്ങള് മൂലം പിരിഞ്ഞു കഴിയുകയായിരുന്നു.
ഹന്സിലിനെ പിടിച്ചപ്പോള് സിമി എന്ന സാനിയയുടെ ലൊക്കേഷന് കിട്ടി
ഹന്സില് ഇപ്പോള് പുനലൂരില് ഒരു സ്വര്ണ്ണവ്യാപാരസ്ഥാപനത്തില് ജോലി ചെയ്ത് വരികയായിരുന്നു. ഹന്സിലെ പിടികൂടി ചോദ്യം ചെയ്തപ്പോഴാണ് സിമി എന്ന സാനിയ പെരിന്തല്മണ്ണയിലുള്ളതായി വിവരം കിട്ടിയത്. സിമികുമാരിയെ കണ്ടെത്താനുള്ള ശ്രമത്തിനിടയിലാണ് പൊലീസിന് ഹന്സിലിനെക്കുറിച്ച് വിവരം ലഭിച്ചത്. ഹന്സിലിന്റെ ഹരിപ്പാടുള്ള വീട്ടില് പൊലീസെത്തി അന്വേഷിച്ചപ്പോഴാണ് ഇപ്പോള് പുനലൂരിലെ സ്വര്ണ്ണവ്യാപാരസ്ഥാപനത്തില് ജോലി ചെയ്യുകയാണെന്ന് മനസ്സിലായത്. പിന്നീട് സൈബര് സെല്ലാണ് യുവതിയുടെ ഫോണ് ലൊക്കേഷന് പെരിന്തല്മണ്ണയിലാണെന്ന് കണ്ടെത്തിയത്. പെരിന്തല്മണ്ണയിലെ വാടകവീട്ടില് നിന്നും പൊലീസ് സിമി എന്ന സാനിയയെ കണ്ടെത്തി. ഒരുമിച്ച് പന്തളത്ത് ജോലി ചെയ്തിരുന്ന സമയത്ത് സഹപ്രവര്ത്തകനായ ഹന്സിലുമായി പോയെന്നും ഇസ്ലാം മതത്തിലേക്ക് മാറി സാനിയ എന്ന പേര് സ്വീകരിച്ചെന്നും യുവതി മൊഴി നല്കി.
