ഇടുക്കി : തനിക്കെതിരായ ആരോപണങ്ങള്ക്ക് പിന്നില് കെ.വി. ശശിയും എം.എം. മണിയും ആണെന്ന് രൂക്ഷ വിമര്ശനങ്ങളുമായി എസ്. രാജേന്ദ്രന്. സിപിഎമ്മിലെ ചില നേതാക്കള് പിന്തുടര്ന്ന് ഉപദ്രവിക്കുകയാണെന്നും മാധ്യമങ്ങളോട് പ്രതികരിച്ചു.
സിപിഎം ഭരിക്കുന്ന മൂന്നാര് സര്വീസ് സഹകരണ ബാങ്കിന്റെ ഹൈഡല് പ്രോജക്ടിന് തടയിട്ടത് താനാണെന്ന് പ്രചാരണം വ്യാജമാണ്. ഹൈഡല് പദ്ധതിയില് നിയമലംഘനമുണ്ടായതുകൊണ്ടാണ് ഹൈക്കോടതി അതിനെ തടഞ്ഞത്. പദ്ധതിക്കെതിരെ കോടതിയെ സമീപിച്ചത് കോണ്ഗ്രസ്സുകാരാണ് ഇതുമായി തനിക്ക് ഒരു ബന്ധവും ഇല്ലെന്നും രാജേന്ദ്രന് പറഞ്ഞു.
നിയമസഭാ തെരഞ്ഞെടുപ്പ് മുതല് എം.എം.മണി, എസ്.രാജേന്ദ്രന് വാക്ക് തര്ക്കം നടന്നുവരികയാണ്. സിപിഎം സ്ഥാനാര്ത്ഥിയായ അഡ്വ. എ. രാജയെ തോല്പ്പിക്കാന് ശ്രമിച്ചെന്ന ആരോപണം എം.എം. മണിയുയര്ത്തിയതോടെയാണ് ഇരുവരും തമ്മിലുള്ള പോര് ആരംഭിച്ചത്. തുടര്ന്ന് രാജേന്ദ്രനെ പുറത്താക്കാന് എം.എം. മണി ശ്രമിച്ചതോടെ ഇതിനെതിരെ രാജേന്ദ്രന് മാധ്യമങ്ങളിലൂടെ പ്രസ്താവന ഇറക്കി. ഇതോടെ പാര്ട്ടി അന്വേഷണ വിധേയമായി രാജേന്ദ്രനെ പുറത്താക്കുകയായിരുന്നു.
