തിരുവനന്തപുരം: ആലപ്പുഴയില്‍ നടന്ന പോപ്പുലര്‍ ഫ്രണ്ട് റാലിയില്‍ കുട്ടിയെക്കൊണ്ട് വിദ്വേഷ മുദ്രാവാക്യം വിളിപ്പിച്ച കേസില്‍ ഒരാള്‍ കൂടി അറസ്റ്റിലായി. പോപ്പുലര്‍ ഫ്രണ്ട് അഖിലേന്ത്യാ ഓര്‍ഗനൈസര്‍ മലപ്പുറം ആതവനാട് പുന്നത്തല മാനകനകത്തില്‍ ഇബ്രാഹിം (48) ആണ് അറസ്റ്റിലായത്.
പോപ്പുലര്‍ ഫ്രണ്ട് സെപ്തംബര്‍ 23ന് നടത്തിയ ഹര്‍ത്താല്‍ കേസില്‍ കഴിഞ്ഞ ആഴ്ച ഇയാളെ തിരൂര്‍ പൊലീസ് അറസ്റ്റ് ചെയ്തിരുന്നു. ഇബ്രാഹിമിനെ ചോദ്യം ചെയ്തപ്പോഴാണ് ഇയാള്‍ക്ക് വിദ്വേഷ മുദ്രാവാക്യവിളിയുമായി ബന്ധമുണ്ടെന്നറിയുന്നത്. ആലപ്പുഴ പൊലീസ് ഇയാളെ കസ്റ്റഡിയിലെടുത്തു.
മെയ് 21നാണ് പോപ്പുലര്‍ ഫ്രണ്ട് ആലപ്പുഴ റാലിയില്‍ പത്തുവയസ്സുകാരനെക്കൊണ്ട് വിദ്വേഷ മുദ്രാവാക്യം വിളിപ്പിച്ചത്. ‘അവിലും മലരും വാങ്ങിവെച്ചോ, കുന്തിരിക്കം വാങ്ങിവെച്ചോ, വരുന്നുണ്ട്, വരുന്നുണ്ട്, നിന്റെയൊക്കെ കാലന്മാര്‍’- ഇതായിരുന്നു അന്നത്തെ കൊലവിളി മുദ്രാവാക്യം. സംഭവം വിവാദമായതോടെയാണ് കേസെടുത്തത്. കുട്ടിയുടെ അച്ഛന്‍, കുട്ടിയെ തോളത്തേറ്റിയ വ്യക്തി, കുട്ടിയെ പരിശീലിപ്പിച്ചവര്‍, പോപ്പുലര്‍ ഫ്രണ്ട് നേതാക്കള്‍ എന്നിവരടക്കം 35 പേര്‍ പ്രതികളാണ്.
ഈ കേസില്‍ ഇതുവരെ 33 പേരെ അറസ്റ്റ് ചെയ്തിട്ടുണ്ട്. പ്രകടനത്തിനും മറ്റും ആള്‍ക്കാരെ സംഘടിപ്പിക്കുന്ന ചുമതലയായിരുന്നു ഇയാള്‍ക്ക്. റാലിയില്‍ പങ്കെടുക്കാന്‍ മലപ്പുറത്ത് നിന്നും ആള്‍ക്കാരെ എത്തിച്ചത് ഇബ്രാഹിമാണ്. കേസില്‍ രണ്ടാം പ്രതിയായ പോപ്പുലര്‍ ഫ്രണ്ടിന്റെ ആലപ്പുഴ ജില്ലാ സെക്രട്ടറി മുജീബ് മാത്രമാണ് ഇനി പിടിയിലാകാനുള്ളൂ. ഇയാളുടെ ജാമ്യാപേക്ഷ ഹൈക്കോടതി മാറ്റിവെച്ചിരിക്കുകയാണ്. പോപ്പുലര്‍ ഫ്രണ്ട് ജില്ലാ പ്രസിഡന്‍റ് നവാസ് വണ്ടാനം ഒന്നാം പ്രതിയാണ്. ഈരാറ്റുപേട്ട നടയ്‌ക്കല്‍ പാറനാനി അന്‍സാര‍് നജീബ് മൂന്നാം പ്രതിയാണ്.
പ്രതികരിക്കാൻ ഇവിടെ എഴുതുക: