കോഴിക്കോട്: കേരള സാങ്കേതിക സര്വകലാശാല വിസി നിയമനത്തില് സുപ്രീം കോടതി വിധി അന്തിമമാണ്. ഗവര്ണര് ആരിഫ് മുഹമ്മദ് ഖാന് നിയമം നടപ്പിലാക്കാനാണ് ശ്രമിക്കുന്നത്. ചാന്സലറുടെ അധികാരത്തില് കടന്നുകയറുന്നത് മുഖ്യമന്ത്രി പിണറായി വിജയനാണെന്നും ബിജെപി സ്ംസ്ഥാന അധ്യക്ഷന് കെ. സുരേന്ദ്രന് കുറ്റപ്പെടുത്തി.
സിപിഎമ്മുകാരെ ഇറക്കി ഗവര്ണറെ നേരിടാനാണ് ശ്രമമെങ്കില് രാജ്ഭവനും ക്ലിഫ് ഹൗസും തമ്മില് അധികം ദൂരമില്ലെന്ന് ഓര്ക്കണം.ഗവര്ണര് അനാഥനല്ല. ജനങ്ങള് എല്ലാം കാണുന്നുണ്ട്. അതുകൊണ്ട് ഭീഷണി വേണ്ട. അധികാരം രാജഭരണമല്ലെന്നും ഇനി മൂന്ന് കൊല്ലമേയുള്ളൂ. കെടിയു വിസി നിയമനവുമായി ബന്ധപ്പെട്ട സുപ്രീം കോടതി വിധി എല്ലാ സര്വകലാശാലകള്ക്കും ബാധകമാണ്. അത് നടപ്പിലാക്കാനാണ് ഗവര്ണര് ചാന്സലര് സ്ഥാനത്ത് ഇരിക്കുന്നത്.
മുഖ്യമന്ത്രി ഉന്നയിച്ചത് വസ്തുതാ വിരുദ്ധമായ വാദങ്ങളാണ്. മുഖ്യമന്ത്രിയുടെ വാര്ത്താ സമ്മേളനത്തില് ഗവര്ണര്ക്ക് എതിരെ പറയാന് പാടില്ലാത്ത കാര്യങ്ങള് പറഞ്ഞത്. ഗവര്ണറുടെ നടപടിയെ നിയമപരമായി നേരിടുകയാണ് വേണ്ടത്. ഇത്തരം വിഷയങ്ങളില് ജനങ്ങളെ അണിനിരത്തി നേരിടുമെന്നത് വെല്ലുവിളിയാണ്. പാര്ട്ടി സെക്രട്ടറിയെ പോലെയല്ല മുഖ്യമന്ത്രി സംസാരിക്കേണ്ടത്.
ഇരിക്കുന്ന കസേരയുടെ പദവി അറിയാതെയാണ് മുഖ്യമന്ത്രി സംസാരിക്കുന്നത്. അധാര്മ്മികമായ കാര്യങ്ങള് നടന്നത് മുഖ്യമന്ത്രിയുടെ ഓഫീസിലാണ്. സ്വര്ണക്കള്ളക്കടത്തും അനധികൃത നിയമനങ്ങളും നടന്നു. ഉന്നത വിദ്യാഭ്യാസം തകര്ക്കുന്നത് പാര്ട്ടിയും സര്ക്കാരുമാണ്. മന്ത്രിമാര് ഭരണത്തലവനെ അവഹേളിക്കുകയാണ്. അതിലെന്ത് ധാര്മ്മികതയാണ് ഉള്ളത്? സര്ക്കാര് ജനങ്ങളെ ഭിന്നിപ്പിക്കാന് നോക്കുകയാണെന്നും അദ്ദേഹം കൂട്ടിച്ചേര്ത്തു.
