കൊല്ലം: അഞ്ചാം ക്ലാസുകാരന് സീനിയര്‍ വിദ്യാര്‍ഥികളുടെ ക്രൂരമര്‍ദനം. കായിക പരിശീലന സമയത്ത് സീനിയര്‍ വിദ്യാര്‍ഥികളുടെ ഭാഗത്തേക്ക് ഫുട്ബോള്‍ തെറിച്ച് വീണെന്നാരോപിച്ചായിരുന്നു പള്ളിമുക്ക് സ്വദേശി സുജാദിന്റെ മകനായ പതിനൊന്നുകാരനെ ഏഴ്, എട്ട് ക്ലാസുകളിലെ സീനിയര്‍ വിദ്യാര്‍ഥികള്‍ മര്‍ദിച്ചത്. സംഭവം പുറത്തറിയിച്ചാല്‍ ആസിഡ് ഒഴിക്കുമെന്ന് ഭീഷണിപ്പെടുത്തിയതായും കുട്ടി പറഞ്ഞു.
വെള്ളിയാഴ്ച ഉച്ചയോടെ കൊല്ലം ഇന്‍ഫെന്റ് ജീസസ് സ്‌കൂളിലാണ് സംഭവം നടന്നത്. അഞ്ചാം ക്ലാസുകാരനായ കുട്ടിയെ സ്‌കൂളിലെ സീനിയര്‍ വിദ്യാര്‍ഥികള്‍ തടഞ്ഞ് വെച്ച് മര്‍ദിച്ചെന്നാണ് പരാതി. അടികൊണ്ട് രക്തം വാര്‍ന്ന ശരീരവുമായി വീട്ടിലെത്തിയ ശേഷമാണ് കുട്ടി വിവരം പറഞ്ഞത്.
പരാതിയുമായി കുട്ടിയുടെ രക്ഷിതാക്കള്‍ സ്‌കൂളിലെത്തിയപ്പോള്‍ സിസി ടിവി പരിശോധിക്കാന്‍ സ്‌കൂള്‍ അധികൃതര്‍ തയ്യാറായില്ലെന്ന് പിതാവ് സുജാദ് പറഞ്ഞു. തുടര്‍ന്ന് വെസ്റ്റ് പോലീസില്‍ പരാതി നല്‍കി. സംഭവത്തില്‍ സിഡബ്ല്യൂസിയും കേസെടുത്തു. സംഭവം ശ്രദ്ധയില്‍പ്പെട്ടെന്നും ഉചിതമായ നടപടി സ്വീകരിക്കുമെന്നു പ്രിന്‍സിപ്പാല്‍ സില്‍വി ആന്റണി വൃക്തമാക്കി.
സ്‌കൂളില്‍ തന്റെ മകന് മര്‍ദനമേറ്റ സംഭവം ആദ്യത്തേതല്ല, നേരത്തെയും സമാന സംഭവങ്ങള്‍ ഉണ്ടായിട്ടുണ്ട്, ഇനി മകനെ ഈ സ്‌കൂളിലേക്ക് വിടില്ലെന്നും സുജാദ് പ്രതികരിച്ചു. വിദ്യാഭ്യാസ മന്ത്രിക്കുള്‍പ്പെടെ പരാതി നല്‍കുമെന്നും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: