തിരുവനന്തപുരം: ഇന്ത്യന് നാഷണല് അക്കാദമി ഓഫ് എഞ്ചിനീയേഴ്സും (ഐഎന്എഇ), ഐഎസ്ആര്ഒയും സംയുക്തമായി 2022 ഒക്ടോബര് 13 മുതല് 15 വരെ തിരുവനന്തപുരത്ത് ‘എഞ്ചിനീയേഴ്സ് കോണ്ക്ലേവ്2022’ സംഘടിപ്പിക്കും. വലിയമലയിലെ എല്പിഎസ്സി ക്യാമ്പസില് ഒക്ടോബര് 13ന് കേന്ദ്ര ഇലക്ട്രോണിക്സ്, ഐ.ടി, നൈപുണ്യവികസന, സംരംഭകത്വ സഹമന്ത്രി രാജീവ് ചന്ദ്രശേഖര് ഉദ്ഘാടനം ചെയ്യും.
എഞ്ചിനീയറിംഗ് ശാസ്ത്ര സാങ്കേതിക രംഗത്തെ വികസനം, വളര്ച്ചയുടെ നയപരമായ പ്രശ്നങ്ങള്, വികസനത്തിന്റെ വേഗത്തിലുള്ള ആവശ്യകത, മാനവ വിഭവശേഷി മുതലായവയുമായി ബന്ധപ്പെട്ട പ്രധാന ദേശീയ വിഷയങ്ങള് ചര്ച്ച ചെയ്യുന്നതിനുള്ള എഞ്ചിനീയര്മാരുടെ വാര്ഷിക പരിപാടിയാണ് എഞ്ചിനീയേഴ്സ് കോണ്ക്ലേവ്. ‘ബഹിരാകാശം ദേശീയ വികസനത്തിന്’, ‘ഇന്ത്യയെ ഒരു ആഗോള ഉത്പാദന കേന്ദ്രമാക്കുക’ എന്നിവയാണ് എഞ്ചിനീയേഴ്സ് കോണ്ക്ലേവ്-2022 ലെ മുഖ്യ വിഷയങ്ങള്.
ബഹിരാകാശ വകുപ്പ് സെക്രട്ടറിയും ഐഎസ്ആര്ഒ ചെയര്മാനുമാനുമായ എസ് സോമനാഥ്, ഐഎന്എഇ പ്രസിഡന്റും, കോചെയര്പേഴ്സണുമായ പ്രൊഫ. ഇന്ദ്രനീല് മന്ന, എഎഎസ്ആര്ഒ സെന്ററുകളുടെ ഡയറക്ടര്മാര്, ഐഎന്എഇ ഫെല്ലോകള്, രാജ്യത്തെ വിവിധ മേഖലകളില് നിന്നുള്ള പ്രമുഖ ശാസ്ത്രജ്ഞര്, എന്ജിനീയര്മാര്, സാങ്കേതിക വിദഗ്ധര് തുടങ്ങി നാനൂറിലധികം പ്രതിനിധികള് പങ്കെടുക്കും. ഐഎസ്ആര്ഒ കേന്ദ്രങ്ങളും പ്രമുഖ എയ്റോസ്പേസ് സംരംഭങ്ങളും നടത്തുന്ന എഞ്ചിനീയറിംഗ് പ്രദര്ശനങ്ങള്, സമാന്തര ചര്ച്ചകള്, ആസാദി കാ അമൃത് മഹോത്സവത്തിന്റെ ഭാഗമായുള്ള ഖാദി മേള തുടങ്ങിയവ മൂന്നു ദിവസത്തെ കോണ്ക്ലേവിന്റെ ഭാഗമായി നടക്കും.
