കൊച്ചി : സിനിമാ പ്രമോഷന് പ്രോഗ്രാമിനിടെ ഓണ്ലൈന് മാധ്യമ പ്രവര്ത്തകയെ അപമാനിച്ചെന്ന കേസില് നടന് ശ്രീനാഥ് ഭാസിക്ക് താത്കാലിക വിലക്ക്. മാധ്യമ പ്രവര്ത്തകയോട് അപമര്യാദയായി പെരുമാറിയെന്ന കേസ് വിവാദമായ സാഹചര്യത്തില് സിനിമ നിര്മാതാക്കളുടെ സംഘടനയാണ് നടനെതിരെ നടപടി സ്വീകരിച്ചിരിക്കുന്നത്.
ശ്രീനാഥ് ഭാസിക്കെതിരായ കേസില് ഒരു തരത്തിലും ഇടപെടില്ല. അന്വേഷണത്തില് സംഘടനയുടെ ഭാഗത്തു നിന്നും ഇടപെടല് ഉണ്ടാകില്ലെന്ന് നിര്മാതാക്കളുടെ സംഘടന പ്രതികരിച്ചു. സംഭവത്തില് പരാതിക്കാരിയായ ഓണ്ലൈന് മാധ്യമപ്രവര്ത്തകയെ വിളിച്ചുവരുത്തി സംഘടന വിശദീകരണം തേടിയിരുന്നു. തെറ്റ് സംഭവിച്ചതായി ശ്രീനാഥ് ഭാസി സമ്മതിച്ചുവെന്നും ഫിലിം പ്രൊഡ്യൂസേഴ്സ് അസോസിയേഷന് അറിയിച്ചു.
അതേസമയം ശ്രീനാഥ് ഭാസി മയക്കുമരുന്ന് ഉപയോഗിച്ചതായി സംശയത്തെ തുടര്ന്ന് നടന്റെ രക്തം, തലമുടി, നഖം എന്നിവ പോലീസ് ശേഖരിച്ചു. സാംപിളുകള് പോലീസ് പരിശോധനയ്ക്ക് അയച്ചു. സ്ത്രീത്വത്തെ അപമാനിച്ചെന്നാരോപിച്ചാണ് ശ്രീനാഥ് ഭാസിക്കെതിരെ പരാതി നല്കിയിരിക്കുന്നത്. ഇതുമായി ബന്ധപ്പെട്ട് മരട് പോലീസ് നടനെ അറസ്റ്റ് ചെയ്യുകയും രണ്ടുപേരുടെ ജാമ്യത്തില് വിട്ടയയ്ക്കുകയും ചെയ്തിരുന്നു.
