തിരുവനന്തപുരം : കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തില്‍ നടക്കുന്ന ഇന്ത്യ- ദക്ഷിണാഫ്രിക്ക ടി 20യില്‍ ബിസിസിഐ പ്രസിഡന്റ് സൗരവ് ഗാംഗുലിയും പങ്കെടുക്കും. ഇതോടൊപ്പം സംസ്ഥാനത്തെ ലഹരി വിരുദ്ധ ക്യാമ്പയിനുമായും ഗാംഗുലി സഹകരിച്ച് പ്രവര്‍ത്തിക്കും. ബിസിസിഐ ജോയിന്റ് സെക്രട്ടറി ജയേഷ് ജോര്‍ജാണ് ഇക്കാര്യം അറിയിച്ചത്.
കാര്യവട്ടം സ്റ്റേഡിയം ടി 20 പരമ്പരയ്‌ക്കായി ഒരുക്കുന്നതില്‍ അപ്രതീക്ഷിത പ്രതിസന്ധികള്‍ ഉണ്ടായെങ്കിലും ഇപ്പോള്‍ ഒരുക്കങ്ങളെല്ലാം പൂര്‍ത്തിയായിരിക്കുകയാണ്. കാര്യവട്ടം ട്വന്റി 20യുടെ ജനപങ്കാളിത്തം കേരളത്തിന് വനിതാ ഐപിഎല്‍ ടീം കിട്ടാനുള്ള സാധ്യത വര്‍ധിപ്പിക്കുമെന്നും ബിസിസിഐ ജോയിന്റ് സെക്രട്ടറി അറിയിച്ചു.
ബുധനാഴ്ചയാണ് പരമ്പരയിലെ ആദ്യ മത്സരം. ഇതിന്റെ ടിക്കറ്റുകളില്‍ ഭൂരിഭാഗവും വിറ്റഴിഞ്ഞു. മത്സരത്തിനായി ഇരു ടീമുകളും തിരുവനന്തപുരത്ത് എത്തിയിട്ടുണ്ട്. കേരള ക്രിക്കറ്റ് അസോസിയേഷന്റെ നേതൃത്വത്തില്‍ ഗംഭീര സ്വീകരണമാണ് ഇരു ടീമുകള്‍ക്കും ലഭിച്ചത്. ഇരുടീമുകളിലെയും താരങ്ങള്‍ കോവളം ലീലാ ഹോട്ടലിലാണ് താമസം. ബുധനാഴ്ച വൈകീട്ട് ഏഴുമണിക്കാണ് മത്സരം.
പ്രതികരിക്കാൻ ഇവിടെ എഴുതുക: