ന്യൂദല്ഹി : നമീബിയയില് നിന്ന് ഇന്ത്യയിലെത്തിച്ച ചീറ്റപ്പുലികള്ക്ക് പേര് നിര്ദ്ദേശിക്കാന് ജനങ്ങള്ക്ക് അവസരം നല്കി പ്രധാനമന്ത്രി നരേന്ദ്രമോദി. രാജ്യത്തിന്റെ സംസ്കാരത്തോട് ചേര്ന്നു നില്ക്കുന്ന പേരായിരിക്കണമെന്ന മാര്ഗ നിര്ദ്ദേശം മാത്രമാണ് പകരം മുന്നോട്ട് വെച്ചിരിക്കുന്നത്. പ്രധാനമന്ത്രിയുടെ പ്രതിമാസ റേഡിയോ പ്രോഗ്രാമായ മന് കി ബാത്തില് പങ്കെടുത്ത് സംസാരിക്കുകയായിരുന്നു അദ്ദേഹം.
മൃഗങ്ങളെ എങ്ങനെ കൈകാര്യം ചെയ്യണം എന്നതിനെ പറ്റിയും പൊതു ജനങ്ങള്ക്ക് നിര്ദ്ദേശങ്ങള് നല്കാം. മൃഗങ്ങളെ ബഹുമാനിക്കേണ്ടത് നമ്മുടെ കടമയാണെന്നും അദ്ദേഹം പറഞ്ഞു. പ്രധാനമന്ത്രി നരേന്ദ്രമോദി തന്റെ ജന്മദിനമായിരുന്ന സെപ്റ്റംബര് 17ന് നമീബിയയില് നിന്നെത്തിച്ച എട്ട് ചീറ്റപ്പുലികളെയാണ് മധ്യപ്രദേശിലെ കുനോ നാഷണല് പാര്ക്കില് തുറന്നുവിട്ടത്. തുറന്നുവിട്ട ചീറ്റപ്പുലികളുടെ ചിത്രങ്ങള് അദ്ദേഹം ക്യാമറയില് പകര്ത്തുകയും ചെയ്തിരുന്നു.
ഒരുമാസം പ്രത്യേകം സജ്ജമാക്കിയ പ്രദേശത്ത് നിലവില് ക്വാറന്റീനിലാണ് ചീറ്റകള്. ഒരുമാസം നിരീക്ഷിച്ച ശേഷം അവയെ കുനോ നാഷണല് പാര്ക്കിലേക്ക് സൈ്വര്യ വിഹാരത്തിന് വിടും. അതിന് ശേഷം ഓരോ ചീറ്റയേയും നിരീക്ഷിക്കാന് പ്രത്യേക സംഘത്തെ നിയോഗിച്ചിട്ടുണ്ട്.
നമീബിയയില് നിന്നും പ്രത്യേകം സജ്ജമാക്കിയ ബോയിങ് 747 വിമാനത്തിലാണ് 8 ചീറ്റപ്പുലികളുമായുള്ള പ്രത്യേക വിമാനം ഗ്വാളിയാര് വിമാനത്താവളത്തിലെത്തിയത്. മരം കൊണ്ടുണ്ടാക്കിയ പ്രത്യേക കൂടുകളിലായിരുന്നു ഇവര്ക്ക് വിമാനയാത്ര ഒരുക്കിയത്. ഡോക്ടര്മാരടക്കം വിദഗ്ധ സംഘവും കൂടയുണ്ടായിരുന്നു. അഞ്ച് പെണ്ണ് ചീറ്റപ്പുലികളും മൂന്ന് ആണ് ചീറ്റപ്പുലികളുമാണ് ഇന്ത്യയിലെത്തിയത്. തുടര്ന്ന് വ്യോമസേനയുടെ പ്രത്യേക ഹെലികോപ്റ്റുകളിലാണ് കൂനോ നാഷണല് പാര്ക്കിലേക്ക് എത്തിച്ചു.
രണ്ട് വയസ് മുതല് ആറ് വയസ് വരെ പ്രായമുള്ള ചീറ്റകളാണ് ആഫ്രിക്കന് പുല്മേടുകളെ വിട്ട് ഇന്ത്യയിലേക്ക് എത്തിയിരിക്കുന്നത്. ആണ് ചീറ്റകളില് രണ്ട് പേര് സഹോദരങ്ങളാണ്. ഒത്ജിവരോംഗോ റിസര്വില് നിന്നാണ് ഇവരെ പിടിച്ചത്. ഒറ്റ പ്രസവത്തില് ജനിക്കുന്ന ആണ് ചീറ്റകള് ജീവിതകാലം മുഴുവന് ഒരുമിച്ച് ജീവിക്കും. അതാണ് സഹോദരങ്ങളെ ഒരുമിച്ച് അയക്കാന് കാരണം. മൂന്നാമത്തെ ആണ് ചീറ്റ എരിണ്ടി റിസര്വില് നിന്നാണ്. പ്രായം നാല് വയസ്. സംഘത്തിലെ ആദ്യ പെണ് ചീറ്റയെ ചീറ്റ കണ്സര്വേഷന് ഫണ്ട് തെക്ക് കിഴക്കന് നമീബിയയില് നിന്ന് രക്ഷിച്ചെടുത്തതാണ്. 1952 ലാണ് രാജ്യത്ത് ചീറ്റപുലികള്ക്ക് വംശനാശം വന്നതായി പ്രഖ്യാപിക്കുന്നത്.
അതേസമയം ആംഗ്യഭാഷകളുടെ പ്രധാന്യത്തെപ്പറ്റിയും പ്രധാനമന്ത്രി മന് കീ ബാത്തില് പരാമര്ശിച്ചു. ആംഗ്യഭാഷയുടെ നിലവാരം ഉയര്ത്തുന്നതിനായി ദേശീയ വിദ്യാഭ്യാസ നയത്തില് വളരെയധികം ഊന്നല് നല്കിയിട്ടുണ്ടെന്ന് അദ്ദേഹം പറഞ്ഞു. ആംഗ്യഭാഷയുമായി ബന്ധപ്പെട്ട നിരവധി കോഴ്സുകള് സ്കൂള് തലത്തില് സെപ്തംബര് 23ന് അവതരിപ്പിച്ചുവെന്നും മോദി പറഞ്ഞു.
ആംഗ്യഭാഷയ്ക്ക് പ്രാധാന്യം നല്കിയതിന്റെ ഗുണങ്ങള് കേരളത്തില് നിന്നുള്ള മഞ്ജു എന്ന വ്യക്തിയ്ക്ക് ഏറെ ഗുണകരമായതിനെക്കുറിച്ചും അദ്ദേഹം പരാമര്ശം നടത്തി. ആലപ്പുഴ ചേര്ത്തല സ്വദേശിയാണ് മഞ്ജു. ജന്മനാ കേള്വിശക്തിയും സംസാര ശേഷിയുമില്ലാത്ത മഞ്ജുവിന്റെ മാതാപിതാക്കളും ബധിരരാണ്. മഞ്ജു തിരുവനന്തപുരം നിഷില് നിന്ന് ബി കോം ബിരുദം കരസ്ഥമാക്കിയിരുന്നു. നിലവില് എഎസ്എല്ആര് ടി സിയില് പഠിക്കുകയാണ് മഞ്ജുവിപ്പോള്. ഇത് കൂടാതെ ഇന്ത്യയുടെ കായിതാരങ്ങള്ള്ക്ക് പ്രോത്സാഹനം നല്കുന്നത് സംബന്ധിച്ചും മന് കീ ബാത്തില് മോദി പറഞ്ഞു.
