മലപ്പുറം : കളിത്തോക്കുമായി നടുറോട്ടില്‍ അഭ്യാസ പ്രകടനം നടത്തിയ യുവാവ് പിടിയില്‍. അലത്തിയൂര്‍ ആലിങ്ങലിലാണ് നാടകീയ രംഗങ്ങള്‍ അരങ്ങേറിയത്. പൊന്നാനി സ്വദേശിയായ യുവാവ് മറ്റൊരാള്‍ക്കൊപ്പം എത്തി നാട്ടുകാരെ തോക്ക് കാണിച്ച് ഭീഷണിപ്പെടുത്തുകയായിരുന്നു.
പൊന്നാനി സ്വദേശിയായ യുവാവിനൊപ്പം ആലിങ്ങലില്‍ ബൈക്കിലെത്തിയതായിരുന്നു യുവാവ്. ഇയാള്‍ക്കൊപ്പമുണ്ടായിരുന്ന ബൈക്ക് യാത്രികനാണ് തിരൂര്‍ പോലീസിനെ അറിയിച്ചത്. തുടര്‍ന്ന് ഇന്‍സ്പെക്ടര്‍ ജിജോയും മൂന്ന് പോലീസുകാരും സ്ഥലത്തെത്തി. ഇവരെ കണ്ടതോടെ യുവാവ് അരയില്‍ തിരുകിയ തോക്ക് പുറത്തെടുത്ത് പോലീസിന് നേരെ തോക്ക് ചൂണ്ടി. കൈയിലുള്ളത് കളിത്തോക്കാണെന്ന് മനസ്സിലാക്കിയ പോലീസ് യുവാവിനെ പിടിക്കാന്‍ ശ്രമിച്ചതോടെ സമീപത്ത് നിര്‍ത്തിയിട്ടിരുന്ന ഓട്ടോയില്‍ കയറി രക്ഷപ്പെടാന്‍ ശ്രമമുണ്ടായി.
എന്നാല്‍ പോലീസ് ആ ശ്രമം തടഞ്ഞു. ഇതോടെ ആലത്തിയൂര്‍ റോഡിലേക്ക് നടന്നുനീങ്ങിയ യുവാവിനെ ഇന്‍സ്പെക്ടറും സംഘവും പിന്തുടര്‍ന്ന് കീഴ്പ്പെടുത്തുകയായിരുന്നു. ഇതിനിടെ തോക്ക് തകര്‍ന്ന് തരിപ്പണമാകുകയും ചെയ്തു.
മാനസിക രോഗത്തിന് ചികിത്സയിലുള്ളയാളാണ് യുവാവെന്ന് ഇന്‍സ്പെക്ടര്‍ അറിയിച്ചു. ചമ്രവട്ടം ജങ്ഷനില്‍ നിന്നായിരുന്നു ഇയാള്‍ പൊന്നാനിയില്‍ നിന്ന് കൂട്ടായിയിലേക്ക് പോകുകയായിരുന്ന യുവാവിന്റെ ബൈക്കില്‍ കയറിയത്. ബൈക്ക് യാത്രക്കിടെ ഇയാളുടെ പെരുമാറ്റത്തില്‍ സംശയം തോന്നിയതിനാല്‍ ആലിങ്ങലില്‍ യുവാവ് ഇറങ്ങിയ ശേഷം യുവാവ് പോലീസില്‍ വിവരം അറിയിക്കുകയായിരുന്നു.
പ്രതികരിക്കാൻ ഇവിടെ എഴുതുക: