കൊല്ലം: ശക്തികുളങ്ങരയില് റോഡരികിൽ നിന്ന് രണ്ട് തലയോട്ടികള് കണ്ടെത്തി. ശുചീകരണ തൊഴിലാളികളാണ് പ്രവര്ത്തനമില്ലാതെ കിടന്ന ആശുപത്രിക്ക് സമീപത്തെ റോഡില് നിന്നും രണ്ട് തലയോട്ടികള് കവറില് പൊതിഞ്ഞ നിലയില് കണ്ടെത്തിയത്. കവറിനുള്ളിൽ തലയോട്ടികളാണെന്ന് വ്യക്തമായതോടെ ശുചീകരണ തൊഴിലാളികൾ ശക്തികുളങ്ങര പോലീസ് സ്റ്റേഷനിൽ വിളിച്ച് വിവരം അറിയിക്കുകയായിരുന്നു.
ഞായറാഴ്ച രാവിലെ ഒമ്പത് മണിയോടെയാണ് സംഭവം. പരിശോധനയില് തലയോട്ടികള് ഏറെ പഴക്കം ചെന്നവയാണെന്ന് കണ്ടെത്തി. തലയോട്ടികള് കൂടാതെ കവറിനുള്ളില് നിന്ന് മെഡിക്കല് വിദ്യാര്ത്ഥികള് ഉപയോഗിക്കുന്നതിന് സമാനമായ കുറിപ്പുകളും കണ്ടെത്തി എന്നാണ് പോലീസ് നല്കിയ വിവരം.
രണ്ട് തലയോട്ടികളും പാരിപ്പള്ളി മെഡിക്കല് കോളേജ് ആശുപത്രിയില് സൂക്ഷിച്ച ശേഷം ഫോറന്സിക് പരിശോധനയ്ക്ക് അയച്ചുവെന്നും പോലീസ് അറിയിച്ചു.
