തിരുവനന്തപുരം : സര്വ്വകലാശാലകളില ബന്ധു നിയമനങ്ങള്ക്കെതിരെയുള്ള നടപടികള്ക്ക് പിന്നാലെ ഗവര്ണര് ആരിഫ് മുഹമ്മദ് ഖാനെ വിമര്ശിച്ച് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. സര്വകലാശാല നിയമനത്തിന്റെ പേരില് ജനങ്ങളുടെ കണ്ണില് പൊടിയിട്ട് കമ്യൂണിസ്റ്റ് വിരുദ്ധ ജ്വരം പടര്ത്താനാണ് ഗവര്ണറുടെ ശ്രമമെന്നും കോടിയേരി വിമര്ശിച്ചു. പാര്ട്ടി മുഖപത്രമായ ദേശാഭാനിയില് എഴുതിയ ലേഖനത്തിലാണ് ഈ വിമര്ശനം.
ഗവര്ണര് മോദിയുടെ ചട്ടുകമായി പ്രവര്ത്തിക്കുകയാണ്. വളയമില്ലാതെ ചാടരുത്. സര്വകലാശാല നിയമനത്തിന്റെ പേരില് ജനങ്ങളുടെ കണ്ണില് പൊടിയിട്ട് കമ്യൂണിസ്റ്റ് വിരുദ്ധ ജ്വരം പടര്ത്താനാണ് ഗവര്ണറുടെ ശ്രമം. പ്രതിപക്ഷം ഗവര്ണറുടെ നിലപാടിന് ചൂട്ടുപിടിക്കുകയാണ്. ഗവര്ണര്- സര്ക്കാര് ഏറ്റുമുട്ടലിന്റെ രാഷ്ട്രീയം ജനങ്ങള് തിരിച്ചറിയും. ഗവര്ണറുടെ വളയമില്ലാ ചാട്ടത്തിന്റെ രാഷ്ട്രീയ നിലവാരം എന്തെന്ന് വ്യക്തമാക്കുന്നതാണ് കണ്ണൂര് വൈസ് ചാന്സിലര്ക്കെതിരായ ചുവടുവെപ്പുകള്.
ഗവര്ണര് റബര് സ്റ്റാമ്പോ രാഷ്ട്രപതിക്കും സംസ്ഥാനമന്ത്രിസഭയ്ക്കും മധ്യേയുള്ള തപാല് ഓഫീസോ ആയി പരിമിതപ്പെടണമെന്ന് എല്ഡിഎഫ് ശഠിക്കുന്നില്ല. ഭരണഘടനാ വ്യവസ്ഥകള് പരിശോധിക്കാനും അവ ആസ്വദിക്കാനും ഗവര്ണര്ക്ക് കഴിയും. എന്നാല് ഭരണഘടനയ്ക്ക് വിധേയമാകാതെ പ്രവര്ത്തിക്കുകയും വര്ത്തമാനം പറയുകയും ചെയ്യുന്നത് വഴിതെറ്റലാണ്. അത്തരം വളയമില്ലാത്ത ചാട്ടം ഗവര്ണര് അവസാനിപ്പിക്കണം.
മന്ത്രിസഭ അംഗീകരിച്ച് സമര്പ്പിച്ച ഓര്ഡിനന്സില് ഒപ്പിടാതെ ഗവര്ണര് സ്ഥലംവിട്ടത് ആര്എസ്എസ്- ബിജെപി ഭരണത്തെ തൃപ്തിപ്പെടുത്താനാണ്. ജനങ്ങള് തെരഞ്ഞെടുത്ത മന്ത്രിസഭ നിലനില്ക്കെ സമാന്തര ഭരണം അടിച്ചേല്പ്പിക്കാനാണ് ഗവര്ണര് ശ്രമിക്കുന്നത്. ഗവര്ണര്ക്ക് സംസ്ഥാന ഭരണത്തലവനെന്ന വിശേഷണമുണ്ട്. എന്നാല് അത് ജനങ്ങള് തെരഞ്ഞെടുത്ത ഭരണത്തെ മറികടക്കാനുള്ള സ്ഥാനമല്ല. ഇത് മനസ്സിലാക്കുന്നതില് ആരിഫ് മുഹമ്മദ് ഖാന് വലിയ പിഴവ് പറ്റിയിട്ടുണ്ടെന്നുമാണ് കോടിയേരിയുടെ ലേഖനത്തില് പറയുന്നത്.
ഒര്ഡിനന്സ് വിശദമായി പറയാതെ ഒപ്പുവെയ്ക്കില്ലെന്നായിരുന്നു ഗവര്ണറുടെ നിലപാട് ഇതോടെ ഇതിനുള്ള സമയപരിധി അവസാനിക്കുകയായിരുന്നു. ഇത് കൂടാതെ മുഖ്യമന്ത്രിയുടെ പ്രൈവറ്റ് സെക്രട്ടറി കെ.കെ. രാഗേഷിന്റെ ഭാര്യ പ്രിയ വര്ഗീസിനെ അസോസിയേറ്റ് പ്രൊഫസര് തസ്തികയിലേക്ക് നിയമിക്കാനുള്ള കണ്ണൂര് സര്വകലാശാലയുടെ നീക്കം സംസ്ഥാന ഗവര്ണര് മരവിപ്പിച്ചിരുന്നു. കൂടാതെ സര്വകലാശാലകളിലെ ബന്ധു നിയമനങ്ങള്ക്കെതിരെ അന്വേഷണം നടത്തി നടപടി സ്വീകരിക്കുമെന്നും ആരിഫ് മുഹമ്മദ് ഖാന് അറിയിച്ചിട്ടുണ്ട്. ഇത് പാര്ട്ടിയെ പ്രതിരോധത്തിലാക്കിയതോടെയാണ് സിപിഎം നേതാക്കള് ഗവര്ണര്ക്കെതിരെ പ്രതിഷേധം ശക്തമായത്.
