കാര്‍ത്തിയെ നായകനാക്കി 2ഡി എന്റര്‍ടെയ്ന്‍മെന്റിന്റെ ബാനറില്‍ സൂര്യയും ജ്യോതികയും നിര്‍മ്മിച്ച ‘ വിരുമന്’ ആഗസ്റ്റ് 12-ന്, നാളെ ലോകമെമ്പാടും റിലീസാവുകയാണ്. ഇതു വരെ ഒരു കാര്‍ത്തി സിനിമയ്‌ക്കും നല്‍കാത്ത പ്രചരണമാണ് അണിയറക്കാര്‍ വിരുമന് നല്‍കി വരുന്നത്.കഴിഞ്ഞ ദിവസം തിരുവനന്തപുരത്ത് കാര്‍ത്തിയും അദിതിയും പങ്കെടുത്ത പ്രചരണ പരിപാടികള്‍ മാധ്യമങ്ങളിലൂടെ വലിയ ശ്രദ്ധയാകര്‍ഷിച്ചിരുന്നു.
ചിത്രത്തില്‍ ഗ്രാമീണ നായകനും നായികയുമായിട്ടാണ് കാര്‍ത്തിയും അദിതിയും എത്തുന്നത്. ഇതിന്റെ സ്റ്റില്ലുകളും നേരത്തെ പുറത്തു വന്നിരുന്നു. കോടമ്പാക്കത്തിപ്പോള്‍ കാര്‍ത്തി-അദിതി ജോഡി പൊരുത്തമാണ് ചര്‍ച്ചാ വിഷയം.അതിന് ഉത്തേജനം നല്‍കും വിധം ചിത്രത്തിലെ വേഷത്തില്‍ നിന്നും വ്യത്യസ്തമായി ഈ സെന്‍സേഷണല്‍ ജോഡികളുടെ മോഡേണ്‍ സ്‌റ്റൈല്‍ ഫോട്ടോകള്‍ പുറത്ത് വിട്ട് തരംഗമാക്കിയിരിക്കയാണ് അണിയറക്കാര്‍.
മുത്തയ്യ രചനയും സംവിധാനവും നിര്‍വഹിക്കുന്ന വിരുമനില്‍ സംവിധായകന്‍ ഷങ്കറിന്റെ ഇളയപുത്രി, പുതുമുഖം അതിഥി ഷങ്കറാണ് കാര്‍ത്തിയുടെ നായിക. ‘പരുത്തി വീരന്‍ ‘ എന്ന അരങ്ങേറ്റ ചിത്രത്തിലൂടെ തന്നെ തമിഴ് സിനിമയില്‍ വേരോട്ടം നടത്തിയ കാര്‍ത്തിക്ക് ഗ്രാമീണ വേഷത്തില്‍ മറ്റൊരു വഴിത്തിരിവായിരുന്നു മുത്തയ്യ സംവിധാനം ചെയ്ത ‘ കൊമ്പന്‍ ‘ . ഇതിനു ശേഷം കാര്‍ത്തിയും മുത്തയ്യയും ഒന്നിക്കുന്ന ചിത്രമാണ് ‘ വിരുമന് ‘. ഇത് ഗ്രാമീണ പശ്ചാത്തലത്തിലുള്ള വൈകാരികമായ ആക്ഷന്‍ എന്റര്‍ടൈനറായിരിക്കുമെന്ന് അണിയറക്കാര്‍.
അച്ഛനും മകനും തമ്മിലുള്ള പോരാണ് ഇതിവൃത്തം. പ്രകാശ് രാജാണ് കാര്‍ത്തിയുടെ അച്ഛന്‍ കഥാപാത്രത്തെ അവതരിപ്പിക്കുന്നത്. ഇരുവരുടെയും കടുത്ത മത്സരാഭിനയത്തിനാണ് പ്രേക്ഷകര്‍ സാക്ഷികളാവാനിരിക്കുന്നത്. എസ്.കെ. ശെല്‍വകുമാര്‍ ഛായഗ്രഹണവും യുവന്‍ ഷങ്കര്‍രാജ സംഗീത സംവിധാനവും നിര്‍വഹിക്കുന്നു.അനല്‍ അരശാണ് ചിത്രത്തിലെ സാഹസികമായ സംഘടന രംഗങ്ങള്‍ ഒരുക്കിയിരിക്കുന്നത്.രാജശേഖര്‍ കര്‍പ്പൂര സുന്ദരപാണ്ഡ്യനാണ് സഹ നിര്‍മ്മാതാവ്. ഫോര്‍ച്യൂണ്‍ സിനിമാസാണ് കേരളത്തില്‍ നൂറില്‍ പരം തിയേറ്ററുകളില്‍ ‘ വിരുമന് ‘റീലീസ് ചെയ്യുന്നത്.
പ്രതികരിക്കാൻ ഇവിടെ എഴുതുക: