തിരുവനന്തപുരം: ജില്ലയില് ഇന്നും നാളെയും 24 മണിക്കൂറില് 204.4 മില്ലി മീറ്റര് മഴയില് കൂടുതലുള്ള അതിതീവ്രമായ മഴ ലഭിക്കാനുള്ള സാധ്യതയുള്ളതായി കേന്ദ്ര കാലാവസ്ഥാ വകുപ്പ വകുപ്പ് അറിയിച്ചു. ആഗസ്റ്റ് മൂന്നിന് 24 മണിക്കൂറില് 115.6 മില്ലീ മീറ്റര് മുതല് 204.4 മില്ലീ മീറ്റര് വരെ അതിശക്തമായ മഴ ലഭിക്കാനുള്ള സാധ്യതയുള്ളതായും അധികൃതര് വ്യക്തമാക്കി.
അതേസമയം ആഗസ്റ്റ് നാലിന് 64.5 മില്ലീ മീറ്റര് മുതല് 115.5 മില്ലി മീറ്റര് വരെയുള്ള ശക്തമായ മഴയ്ക്ക് സാധ്യതയുണ്ട്. ഈ സാഹചര്യത്തില് തിരുവനന്തപുരം ജില്ലയില് ഇന്നും നാളെയും റെഡ് അലര്ട്ടും ആഗസ്റ്റ് മൂന്നിന് ഓറഞ്ച് അലര്ട്ടും ആഗസ്റ്റ് നാലിന് മഞ്ഞ അലര്ട്ടും പ്രഖ്യാപിച്ചു. കഴിഞ്ഞ ദിവസങ്ങളില് വലിയ അളവില് മഴ ലഭിച്ച പ്രദേശങ്ങളില് മഴ തുടരുന്ന സാഹചര്യത്തില് താഴ്ന്ന പ്രദേശങ്ങള്, നദീതീരങ്ങള്, ഉരുള്പൊട്ടല്മണ്ണിടിച്ചില് സാധ്യതയുള്ള മലയോര പ്രദേശങ്ങള് എന്നിവിടങ്ങളില് താമസിക്കുന്നവര് അതീവ ജാഗ്രത പാലിക്കണമെന്ന് അറിയിപ്പില് പറയുന്നു.
മുന്വര്ഷങ്ങളില് ഉരുള്പൊട്ടല്മണ്ണിടിച്ചില്, വെള്ളപ്പൊക്കം എന്നിവ ഉണ്ടായ മേഖലകളില് ഉള്ളവരും ജിയോളജിക്കല് സര്വേ ഓഫ് ഇന്ത്യയും സംസ്ഥാന ദുരന്ത നിവാരണ അതോറിറ്റിയുടെ വിദഗ്ധ സമിതിയും അപകട സാധ്യത മേഖലകള് അഥവാ വാസയോഗ്യമല്ലാത്ത പ്രദേശങ്ങളെന്ന് കണ്ടെത്തിയ സ്ഥലങ്ങളില് താമസിക്കുന്നവരും അവിടങ്ങളിലുള്ള തദ്ദേശ സ്ഥാപനങ്ങളും സര്ക്കാര് സംവിധാനങ്ങളും അപകട സാധ്യത മുന്നില്ക്കണ്ട് തയാറെടുപ്പുകള് പൂര്ത്തീകരിക്കണം. കോവിഡ് 19 ന്റെ പശ്ചാത്തലത്തില് ദുരിതാശ്വാസ ക്യാമ്പുകള് നടത്താന് സംസ്ഥാന ദുരന്ത നിവാരണ അതോറിറ്റി ഓറഞ്ച് ബുക്ക് 2021ലൂടെ നിര്ദേശിച്ച തരത്തിലുള്ള തയാറെടുപ്പുകള് പൂര്ത്തീകരിക്കേണ്ടതാണ്.
