ആലപ്പുഴയില് നിന്ന് ചെറിയ ബഡ്ജറ്റ് സിനിമകള്ക്ക് ആശ്വാസമായ പാക്കേജുമായി ശ്രദ്ധിക്കപ്പെട്ട ഓസ്വോ ഫിലിം ഫാക്ടറിയുടെ അമരക്കാരായ അജിത് സോമന്, നിതിന് നിബു എന്നിവര് സംവിധാന രംഗത്ത് അരങ്ങേറുന്നു. ഷാര്പ് ടൈം സിനിമാസിന്റെ ബാനറില് ഇവര് സംവിധാനം ചെയ്യുന്ന ‘നീതി’ എന്ന സിനിമയുടെ ചിത്രീകരണം ഉടന് ആരംഭിക്കും.
ചെറിയ ബഡ്ജറ്റ് ഒടിടി സിനിമയ്ക്കു വേണ്ടി പാക്കേജ് ആയി എഡിറ്റിങ്, ടൈറ്റില്സ്, വിഎഫ്ക്ട്സ്, കളറിങ് ജോലികള് ചെയ്യുന്ന ഓസ്വോ ഫിലിം ഫാക്ടറി, ഷോലെ, സുന്ദരി, നിങ്ങള് ക്യാമറ നിരീക്ഷണത്തില് ആണ്, ചേറ്, കെണി എന്നീ ചിത്രങ്ങളുടെ വര്ക്കുകള് പൂര്ത്തീകരിച്ചു കഴിഞ്ഞു. ഷൂട്ടിങ് നിന്ന് പോയ സിനിമകള്ക്ക് ക്യാമറ ഉള്പ്പെടെയുള്ള പാക്കേജും നല്കുന്ന ഇവര് ആദ്യമാണ് സിനിമ സംവിധാന രംഗത്തേക്ക് കടക്കുന്നത്.
ഇരുവരും സംവിധാനം ചെയ്ത ‘അറ്റം’ എന്ന ഷോര്ട്ട് ഫിലിമിന് നിരവധി ദേശീയ അന്തര് ദേശീയ പുരസ്കാരങ്ങള് ലഭിക്കുകയുണ്ടായി. നിരവധി ടെലിഫിലിമുകള് സംവിധാനം ചെയ്ത ഇവര് സംവിധാനം ചെയ്യുന്ന ആദ്യ ചിത്രമായ ‘നീതി’ വ്യത്യസ്തമായ ഒരു ഇതിവൃത്തമാണ് അവതരിപ്പിക്കുന്നത്. ആലപ്പുഴയിലും പരിസരങ്ങളിലുമായി ഉടന് ചിത്രീകരണം തുടങ്ങും. പിആര്ഒ- അയ്മനം സാജന്.
