നഞ്ചിയമ്മയ്‌ക്ക് പിന്തുണയുമായി സിതാര കൃഷ്ണകുമാറും സുജാത മോഹനും; “നഞ്ചിയമ്മയുടേത് നെഞ്ചില്‍ തട്ടിത്തെറിച്ചു വരുന്ന പാട്ട്”

തിരുവനന്തപുരം: മികച്ച പിന്നണിഗായികയ്‌ക്കുള്ള ദേശീയ പുരസ്കാരം നേടിയ നഞ്ചിയമ്മയ്‌ക്ക് പിന്തുണയുമായി ഗായികമാരായ സിതാര കൃഷ്ണകുമാറും സുജാത മോഹനും.  

“ഈ അവാര്‍ഡ് ഒരു തെളിച്ചമാണ്. പാട്ട്…അത് തൊണ്ടയില്‍ നിന്നോ തലച്ചോറില്‍ നിന്നോ അല്ല വരേണ്ടത്. നെഞ്ചില്‍ തട്ടി തെറിച്ചു വരേണ്ടതാണ്…എങ്കില്‍ ആ പാട്ട് നഞ്ചിയമ്മയുടെ പാട്ടുപോലെ ചങ്കില്‍ തന്നെ വന്നു കൊള്ളും!”- സിതാര ഫേസ് ബുക്കില്‍ കുറിച്ചു. ഈ കുറിപ്പിനൊപ്പം നഞ്ചിയമ്മയെ ചേര്‍ത്തുപിടിച്ചുനില്‍ക്കുന്ന ചിത്രവും പങ്കുവെച്ചിട്ടുണ്ട്.  

സൂര്യയെ ഉള്‍പ്പെടെ അഭിനന്ദിക്കുന്ന കൂട്ടത്തിലാണ് സുജാത മോഹന്‍ നഞ്ചിയമ്മയെയും അഭിനന്ദിച്ചിരിക്കുന്നത്. ഏറ്റവും മികച്ച പിന്നണി ഗായികയ്‌ക്കുള്ള പുരസ്കാരം നഞ്ചിയമ്മയ്‌ക്ക് ലഭിച്ചതില്‍ സന്തോഷം എന്നാണ് സുജാതയുടെ ഫേസ് ബുക്ക് പോസ്റ്റ്.