തിരുവനന്തപുരം: തിരുവനന്തപുരം കോര്‍പ്പറേഷനിലെ കെട്ടിട നമ്പര്‍ തട്ടിപ്പില്‍ പ്രതികളെ പിടികൂടെ സിപിഎം ഭരണസമിതിയും പോലീസും നടക്കുന്ന ഒത്തുകളിക്കെതിരെ ബിജെപി ഇന്ന് മുതല്‍ സമരം ശക്തമാക്കുമെന്ന് ബിജെപി ജില്ലാ പ്രസിഡന്റ് അഡ്വ.വി.വി രാജേഷ്. വ്യത്യസ്ഥ ഘട്ടങ്ങളിലേയ്‌ക്ക് സമരം ഇന്ന് മുതല്‍ മാറും. നഗരത്തിലെ കണ്ണായ പ്രദേശത്ത് നൂറു കണക്കിന് കെട്ടിടങ്ങള്‍ അനധിക്യതമായിട്ടാണ് പ്രവര്‍ത്തിക്കുന്നത്. ഇതിന് പിന്നില്‍ വലിയ മാഫിയകളാണ്. ഉദ്യോഗസ്ഥര്‍ക്കും സിപിഎം അധികാരികള്‍ക്കും പണം നല്‍കിയാണ് ഇത്തരക്കാര്‍ തട്ടിപ്പ് നടത്തുന്നത്.
ബാലിശമായ കരങ്ങളിലാണ് തിരുവനന്തപുരം നഗരസഭയുടെ ഭരണം എല്‍പ്പിച്ചിരിക്കുന്നത്. ഇതിന്റെ ദുരിതം പേറുന്നതാകട്ടെ സാധാരണക്കാരായ ജനങ്ങളും. തട്ടിപ്പിനെതിരെ ശരിയായി അന്വേഷണം നടത്തുന്ന ഉദ്യോഗസ്ഥര്‍ക്കെതിരെയാണ് നടപടി സ്വീകരിക്കുന്നത്. തട്ടിപ്പ് കണ്ടുപിടിച്ചെന്ന് പറഞ്ഞ് സിപിഎം ഭരണസമിതി പരാതി കൊടുത്തത് നാടകമാണ്. ഭരിക്കുന്നവര്‍ തന്നെ അന്വേഷണത്തിന് തടസ്സം നില്‍ക്കുന്ന സ്ഥിതിയാണ് നിലവിലുള്ളത്. ഇതിനെതിരെ വിട്ടുവീഴ്ചയില്ലാത്ത സമരങ്ങളുമായി ബിജെപി വരും ദിവസങ്ങളില്‍ രംഗത്ത് വരുമെന്ന് രാജേഷ് പറഞ്ഞു.
പ്രതികരിക്കാൻ ഇവിടെ എഴുതുക: