കൊച്ചി: കേരളത്തിലെ സര്വ്വകലാശാലകളില് പിഎച്ച്ഡി വിദ്യാര്ത്ഥികള്ക്ക് ഫെല്ലോഷിപ്പ് നിര്ത്തലാക്കിയ നടപടി പിന്വലിക്കണമെന്ന് പട്ടികജാതി മോര്ച്ച സംസ്ഥാന പ്രസിഡന്റ് ഷാജുമോന് വട്ടേക്കാട് ആവശ്യപ്പെട്ടു. മറ്റ് സംസ്ഥാനങ്ങളില് സര്വ്വകലാശാലകളാണ് ഫെല്ലോഷിപ്പ് നല്കുന്നത്. എന്നാല് കേരളത്തില് മാത്രം പട്ടികജാതി വികസന വകുപ്പ് ആണ് നല്കുന്നത്. എന്നാല് നാല്പത് വയസ്സ് കഴിഞ്ഞവര്ക്ക് ഫെല്ലോഷിപ്പ് നല്കേണ്ടതില്ലെന്ന് വകുപ്പിന്റെ വിചിത്രമായ തീരുമാനം പട്ടികവിഭാഗ വിദ്യാര്ത്ഥികളെ ഉന്നത വിദ്യാഭ്യാസ മേഖലയില് നിന്നും ഇല്ലായ്മ ചെയ്യും.
രാജ്യത്തെ യൂണിവേഴ്സിറ്റികളില് പിഎച്ച്ഡി ചെയ്യുന്ന പട്ടികജാതി വിദ്യാര്ത്ഥികള്ക്ക് പ്രായ പരിധിയില്ല. മറ്റു സര്വ്വകലാശാലകളിലും സ്ഥാപനങ്ങളിലും യുജിസി അംഗീകരിച്ച കോളജുകളിലും ഉന്നത പഠനത്തിനു പട്ടികജാതി വിദ്യാര്ത്ഥികള്ക്ക് കേന്ദ്രസര്ക്കാര് നേരിട്ട് സാമ്പത്തിക സഹായം നല്കുന്നു. എന്നാല് കേരള സര്ക്കാര് ഇതെല്ലാം അട്ടിമറിക്കുകയാണ്. ഉന്നത വിദ്യാഭ്യാസ രംഗത്ത് പട്ടികജാതി വിഭാഗക്കാര് എത്താതിരിക്കാനുള്ള ആസൂത്രിതവും ബോധപൂര്വവുമായ നീക്കമാണിതിന് പിന്നിലെന്ന് ഷാജുമോന് വട്ടേക്കാട് പറഞ്ഞു.
