തിരുവനന്തപുരം: സംസ്ഥാനത്ത് ചില ജില്ലകളില് തക്കാളിപ്പനി എന്നറിയപ്പെടുന്ന ഹാന്ഡ്ഫൂട്ട് മൗത്ത് ഡിസീസ് (എച്ച്എഫ്എംഡി) റിപ്പോര്ട്ട് ചെയ്യുന്നെങ്കിലും ആശങ്ക വേണ്ടെന്ന് ആരോഗ്യ മന്ത്രി വീണാ ജോര്ജ്. ഈ രോഗത്തിന് അപകട സാധ്യത കുറവാണെങ്കിലും അപൂര്വമായി മസ്തിഷ്ക ജ്വരത്തിന് കാരണമായേക്കാം.
അഞ്ചുവയസില് താഴെയുള്ള കുട്ടികളെയാണ് ഈ രോഗം കൂടുതലായും ബാധിക്കുന്നതിനാല് ഏറെ ശ്രദ്ധ വേണം. രോഗലക്ഷണങ്ങള് കണ്ടാല് ഉടന് ഡോക്ടറുടെ സേവനം തേടണം. കുഞ്ഞുങ്ങള്ക്ക് ഇടയ്ക്കിടയ്ക്ക് കുടിക്കാന് ധാരാളം വെള്ളം കൊടുക്കണം. മറ്റ് കുട്ടികള്ക്ക് ഈ രോഗം പകരാതെ ശ്രദ്ധിക്കണമെന്നും മന്ത്രി വ്യക്തമാക്കി. കുട്ടികളുടെ കൈവെള്ളയിലും പാദത്തിലും വായിലും ചുണ്ടിലുമെല്ലാം കണ്ടുവരുന്ന ഒരിനം വൈറസ് രോഗമാണ് തക്കാളിപ്പനിയെന്ന ഹാന്ഡ്ഫൂട്ട് മൗത്ത് ഡിസീസ്.
ലക്ഷണങ്ങള്
പനി, ക്ഷീണം, സന്ധിവേദന, കൈവെള്ളയിലും കാല്വെള്ളയിലും വായ്ക്കകത്തും പൃഷ്ഠഭാഗത്തും കൈകാല്മുട്ടുകളുടെ ഭാഗത്തും ചുവന്ന കുരുക്കളും തടിപ്പുകളും. വയറുവേദന, ഓക്കാനം, ഛര്ദ്ദി, വയറിളക്കം എന്നിവയും ഉണ്ടാകാം. തുടര്ച്ചയായ പനി, കഠിനമായ ക്ഷീണം, അസ്വസ്ഥത, കൈകാലുകളിലെ രക്തചംക്രമണത്തിനു തടസം എന്നീ ലക്ഷണങ്ങള് കാണിച്ചാല് ഉടന് ഡോക്ടറുടെ സേവനം ലഭ്യമാക്കണം.
രോഗപ്പകര്ച്ച
രോഗബാധിതരില് നിന്നും നേരിട്ടാണ് രോഗം മറ്റുള്ളവരിലേക്ക് പകരുന്നത്. രോഗം ബാധിച്ച കുഞ്ഞുങ്ങളില് നിന്ന് മൂക്കിലേയും തൊണ്ടയിലെയും സ്രവം വഴിയോ ഉമിനീര്, തൊലിപ്പുറമെയുള്ള കുമിളകളില് നിന്നുള്ള സ്രവം, രോഗിയുടെ മലം തുടങ്ങിയവ വഴിയുള്ള സമ്പര്ക്കം വഴിയോ മറ്റൊരാളിലേക്ക് പകരുന്നു. രോഗികളായ കുഞ്ഞുങ്ങള് തൊട്ട കളിപ്പാട്ടങ്ങളും വസ്ത്രങ്ങളും മറ്റും തൊടുന്നത് വഴി പോലും രോഗം പകരാം.
ചികിത്സ, പ്രതിരോധം
സാധാരണഗതിയില് ഒരാഴ്ച മുതല് പത്ത് ദിവസം കൊണ്ട് രോഗം പൂര്ണമായും മാറും. രോഗം വന്ന കുഞ്ഞുങ്ങളുടെ ശരീരം എപ്പോഴും വൃത്തിയായും ശുചിയായും സൂക്ഷിക്കണം. കുളിപ്പിക്കുമ്പോള് തേച്ചുരച്ച് കുമിള പൊട്ടിക്കരുത്. വായ്ക്കകത്തെ ബുദ്ധിമുട്ട് കുറയ്ക്കാന് വൃത്തിയുള്ള തണുപ്പുള്ള ഭക്ഷണമെന്തെങ്കിലും കൊടുക്കാം. നിര്ജലീകരണം ഉണ്ടാകാതിരിക്കാന് ധാരാളം വെള്ളം കുടിക്കണം. ദേഹത്തു വരുന്ന കുരുക്കള് ചൊറിഞ്ഞുപൊട്ടാതിരിക്കാന് ശ്രദ്ധിക്കണം.
വസ്ത്രങ്ങള്, കളിപ്പാട്ടങ്ങള് തുടങ്ങിയവ മറ്റു കുട്ടികള് ഉപയോഗിക്കാന് അനുവദിക്കരുത്. കുഞ്ഞിനെ ശുശ്രൂഷിക്കുന്നവര് തൊടുന്നതിന് മുന്പും ശേഷവും കൈ സോപ്പിട്ട് കഴുകണം. രോഗബാധിതരായ കുട്ടികളെ അങ്കണവാടികളിലും സ്കൂളുകളിലും വിടരുത്. വീട്ടിലെ മറ്റ് കുട്ടികളുമായുള്ള ഇടപെടല് ഈ കാലയളവില് ഒഴിവാക്കണം.
