തിരുവനന്തപുരം: കേരളത്തില് വരും മണിക്കൂറുകളില് ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. അടുത്ത മൂന്ന് മണിക്കൂറില് സംസ്ഥാനത്ത് എല്ലാ ജില്ലകളിലും ഒറ്റപ്പെട്ടയിടങ്ങളിലാണ് മഴ പ്രതീക്ഷിക്കുന്നത്. 12 ജില്ലകളില് ഇന്നും ജാഗ്രത നിര്ദ്ദേശം തുടരുകയാണ്.
തിരുവനന്തപുരം, കൊല്ലം ഒഴികെയുള്ള 12 ജില്ലകളിലാണ് ജാഗ്രത നിര്ദ്ദേശം. ഇതില് ഇടുക്കി, തൃശൂര്, മലപ്പുറം കോഴിക്കോട്, കണ്ണൂര്, കാസര്കോട് എന്നീ ആറ് ജില്ലകളില് ഇന്ന് ഓറഞ്ച് അലര്ട്ട് പ്രഖ്യാപിച്ചിരിക്കുകയാണ്. അതേസമയം പത്തനംതിട്ട, ആലപ്പുഴ, കോട്ടയം, എറണാകുളം, പാലക്കാട്, വയനാട് എന്നീ ജില്ലകളിലാണ് ഇന്ന് യെല്ലോ അലര്ട്ടുള്ളത്.
മധ്യപ്രദേശിന് മുകളിലായുള്ള ന്യൂനമര്ദ്ദവും അറബിക്കടലില് നിന്നുള്ള കാലവര്ഷ കാറ്റും ശക്തമായതുമാണ് മഴയ്ക്ക് കാരണം. ശക്തമായ, ഉയര്ന്ന തിരമലകള്ക്ക് സാധ്യത ഉള്ളതിനാല് തീര്ദേശവാസികള് ജാഗ്രത പാലിക്കണം. മലയോരമേഖലകളിലും പ്രത്യേക ജാഗ്രത വേണമെന്ന് നിര്ദ്ദേശമുണ്ട്. മത്സ്യത്തൊഴിലാളികള് കടലില് പോകരുതെന്നും അറിയിപ്പുണ്ട്.
