തിരുവനന്തപുരം: മൃഗങ്ങളില് ആന്ത്രാക്സ് രോഗബാധ സ്ഥിരീകരിച്ചതിനാല് പ്രതിരോധത്തിന് ആരോഗ്യ വകുപ്പ് അടിയന്തര നടപടികള് സ്വീകരിച്ചു വരുന്നതായി ആരോഗ്യ മന്ത്രി വീണാ ജോര്ജ്. തൃശ്ശൂര് അതിരപ്പള്ളി വനമേഖലയിലെ കാട്ടുപന്നികളിലാണ് ആന്ത്രാക്സ് രോഗബാധ സ്ഥിരീകരിച്ചത്. ചത്ത പന്നികളുടെ മൃതശരീരം നീക്കം ചെയ്യാനും മറവ് ചെയ്യാനുമായി പോയവര്ക്ക് പ്രതിരോധ ചികിത്സ നല്കുന്നുണ്ട്. മൃഗങ്ങളില് വാക്സിനേഷന് ആരംഭിക്കാനുള്ള നടപടികളും തുടങ്ങി.
ലക്ഷണങ്ങള്
മൃഗങ്ങളില് നിന്ന് മനുഷ്യരിലേക്ക് പകരുന്ന രോഗമാണിത്. നാലു തരം ആന്ത്രാക്സ് കണ്ടുവരുന്നു. പനി, വിറയല്, തലവേദന, നെഞ്ചുവേദന, ശ്വാസംമുട്ടല്, ചുമ, ഓക്കാനം, ഛര്ദി, വയറുവേദന, ക്ഷീണം, ശരീരവേദന എന്നീ ലക്ഷണങ്ങള് ശ്വാസകോശത്തെ ബാധിക്കുന്ന ആന്ത്രാക്സിന്റെയും തൊലിപ്പുറത്തുണ്ടാകുന്ന ചൊറിച്ചിലോടു കൂടിയ കുരുക്കള്, വ്രണങ്ങള് എന്നിവ ക്യൂട്ടേനിയസ് ആന്ത്രാക്സിന്റെയും ലക്ഷണങ്ങളാണ്. ഇവ സാധാരണയായി മുഖത്തും കഴുത്തിലും കൈകളിലുമാണ് കാണപ്പെടുന്നത്.
ഇതുകൂടാതെ കുടലിനെ ബാധിക്കുന്ന ആന്ത്രാക്സുണ്ട്. പനി, കുളിര്, തൊണ്ടവേദന, കഴുത്തിലെ വീക്കം, ഓക്കാനം, ഛര്ദി, രക്തം ഛര്ദിക്കുക, മലത്തിലൂടെ രക്തം പോകുക, വയറുവേദന, ബോധക്ഷയം എന്നിവയാണ് ഇതിന്റെ ലക്ഷണങ്ങള്. ഇന്ജക്ഷന് അന്ത്രാക്സും റിപ്പോര്ട്ട് ചെയ്തിട്ടുണ്ട്. ഇതിന്റെ ലക്ഷണങ്ങള് ക്യൂട്ടേനിയസ് ആന്ത്രാക്സിന്റെ സമാന ലക്ഷണങ്ങളാണ്.
