പാലക്കാട്: ദേശീയ – സംസ്ഥാന പാതകള് കേന്ദ്രീകരിച്ചുള്ള കവര്ച്ചാ സംഘങ്ങള് സജീവമാകുന്നു. കോയമ്പത്തൂര് – പാലക്കാട്, പാലക്കാട് – തൃശ്ശൂര്, പാലക്കാട് – കോഴിക്കോട് ദേശീയപാതകളും, മുണ്ടൂര് – തൂത സംസ്ഥാനപാതയും കേന്ദ്രീകരിച്ചാണ് കവര്ച്ചാസംഘങ്ങള് ഇടമാക്കിയിട്ടുള്ളത്.
കോയമ്പത്തൂരില് നിന്നും തൃശ്ശൂര്, പാലക്കാട്, മലപ്പുറം ഭാഗത്തേക്കും തൃശ്ശൂര് നിന്നും കോയമ്പത്തൂര് ഭാഗത്തേക്കുള്ള വാഹന യാത്രക്കാരാണ് ഇവരുടെ ലക്ഷ്യം. വാളയാര് മുതല് മുണ്ടൂര് വരെയുള്ള മേഖലയാണ് കള്ളക്കടത്തുകാരുടെ കേന്ദ്രമാവുന്നത്. പുലര്ച്ചെയും, രാത്രി പത്തുമണിക്ക് ശേഷവുമാണ് വാഹനങ്ങള് തട്ടിയെടുക്കുന്നത് വ്യാപകമാവുന്നത്.
കോയമ്പത്തൂര് ദേശീയപാതയില് കഴിഞ്ഞ ഡിസംബറില് കാര് തടഞ്ഞു നിര്ത്തി പണം കവര്ന്ന കേസില് മുഴുവന് പ്രതികളെയും ഇതുവരെ പിടികൂടിയിട്ടില്ല. വേലിക്കാടിനടുത്ത് കാര് തടഞ്ഞു നിര്ത്തി തമിഴ്നാട് സ്വദേശികളെ കൊള്ളയടിച്ച ഈ കാര് തോലനൂരില് കണ്ടെത്തിയിരുന്നു. ഒരു വര്ഷം മുമ്പ് മുണ്ടൂര് – തൂത സംസ്ഥാന പാതയില് എഴക്കാട് ദമ്പതിമാരെ കൊള്ളയടിച്ചിരുന്നു. കോയമ്പത്തൂരില് നിന്നും പെരിന്തല്മണ്ണയിലേക്കു പോകുന്നവരായിരുന്നു ഇവര്.
കല്മണ്ഡപം – ശേഖരിപുരം ബൈപ്പാസിലും സമാനസംഭവം നടന്നിരുന്നു. രണ്ട് വര്ഷം മുമ്പ് തൃശ്ശൂരില് നിന്നും കോയമ്പത്തൂരിലെ ജ്വല്ലറിയിലേക്ക് കൊണ്ടുപോവുകയായിരുന്ന സ്വര്ണമടങ്ങിയ വാഹനം ഇത്തരത്തില് കൊള്ളയടിച്ചിട്ടുണ്ട്. കള്ളക്കടത്തുകാരുടെ ഇടനാഴിയാണ് കോയമ്പത്തൂര്- കോഴിക്കോട് ദേശീയപാത. കുഴല്പ്പണം കടത്തുന്നസംഘങ്ങളാണ് പലപ്പോഴും വാഹനം മാറി തട്ടിയെടുക്കുന്നതെങ്കിലും ഉടമകള്ക്ക് വാഹനം തിരിച്ചു കിട്ടാന് സമയമേറെയെടുക്കും.
വാളയാര്, കസബ, ഹേമാംബിക, കോങ്ങാട്, കല്ലടിക്കോട് സ്റ്റേഷനുകളുടെ പരിധിയില് പെടുന്നതാണ് കോയമ്പത്തൂര്- കോഴിക്കോട് ദേശീയപാതയും മുണ്ടൂര് – തൂത സംസ്ഥാനപാതയും. കുഴല്പ്പണക്കടത്തുകാര് പണം നഷ്ടപ്പെടുമ്പോള് കൃത്യമായ വിവരങ്ങള് പോലീസിന് നല്കാത്തതും അന്വേഷണത്തെ ബാധിക്കുന്നുണ്ട്.
വിജനമായ പാതയില് പലപ്പോഴും അക്രമി സംഘങ്ങള് വാഹനം തട്ടിയെടുക്കുമ്പോള് വാഹനത്തിലുള്ളവര് രക്ഷപ്പെടുന്നത് തലനാരിഴക്കാണ്. തമിഴ്നാട്ടില് നിന്നും സ്വര്ണം, പണം എന്നിവ മലപ്പുറം, കോഴിക്കോട്, തൃശ്ശൂര് എന്നിവിടങ്ങളിലേക്ക് കടത്തുന്നത് പ്രധാനമായും വാളയാര് വഴിയാണ്.
കൃത്യമായ രേഖയുള്ളവര്ക്ക് പലപ്പോഴും നഷ്ടപ്പെട്ട മുതലുകള് തിരിച്ചുകിട്ടുമ്പോള് രേഖയില്ലാത്ത പണവും മറ്റു വസ്തുക്കളും പലപ്പോഴും ഇത്തരത്തില് തട്ടിയെടുക്കപ്പെട്ടാല് വാഹനം കിട്ടിയാലും നഷ്ടപ്പെട്ടതൊന്നും തിരിച്ചുകിട്ടാറില്ല.
