ചാത്തന്നൂര്‍: ചിറക്കര ഇടവട്ടം ക്ഷീരോല്പാദക സഹകരണ സംഘം തെരഞ്ഞെടുപ്പില്‍ ഇടതുമുന്നണി ഘടകകക്ഷികളായ സിപിഎമ്മും സിപിഐയും ഏറ്റുമുട്ടിയപ്പോള്‍ സിപിഐ പാനലിന് വിജയം. ജില്ലയിലെ ഏറ്റവും മികച്ച ക്ഷീരസംഘങ്ങളിലൊന്നായ ഇടവട്ടം ക്ഷീരോല്പാദക സംഘം തുടര്‍ച്ചയായി എട്ട് വര്‍ഷം മികച്ച സംഘത്തിനുള്ള അവാര്‍ഡ് നേടുകയാണ്. നിലവിലെ പ്രസിഡന്റ് ബി. സുരേഷിന്റെ നേതൃത്വത്തിലാണ് സിപിഐ പാനല്‍ മത്സരിച്ചത്.
ബി. സുരേഷിനെ കൂടാതെ സിപിഐ അംഗങ്ങളായ മണികണ്ഠന്‍.ഡി, മോഹനന്‍ പിള്ള, സദാനന്ദക്കുറുപ്പ്, സുരേഷ് ആര്‍.സി, ബേബി വി, ഗിരിജ ജി, ശ്രീജ പി, സോമന്‍ എ. എന്നിവരാണ് വിജയിച്ചത്. ഭരണസമിതി യോഗം ചേര്‍ന്ന് ബി. സുരേഷിനെ വീണ്ടും പ്രസിഡന്റായി തെരഞ്ഞെടുത്തു. ചിറക്കര പഞ്ചായത്തില്‍ സിപിഎമ്മും സിപിഐയും നാളുകളായി നല്ല ബന്ധത്തിലല്ല. സിപിഐയുടെ പ്രസിഡന്റ് ഭരണം നിയന്ത്രിക്കുന്ന ഭരണസമിതിയില്‍ സിപിഎം പ്രതിപക്ഷത്തിന്റെ റോളിലാണ്. അഴിമതി ആരോപണങ്ങള്‍ ഉന്നയിക്കുന്നതും പരസ്പരം ഇരുപാര്‍ട്ടികളുമാണ്. ഇത് പഞ്ചായത്ത് ഭരണത്തെയും ബാധിക്കുന്നു.
പലപ്പോഴും പഞ്ചായത്തില്‍ സിപിഐയുടെ രക്ഷയ്‌ക്ക് എത്തുന്നത് കോണ്‍ഗ്രസ്-ബിജെപി അംഗങ്ങളാണ്. ഭരണപക്ഷമായിട്ടും സിപിഎമ്മിന്റെ താല്പര്യങ്ങള്‍ പഞ്ചായത്തില്‍ നടക്കാറുമില്ല. ഇതിന്റെ തുടര്‍ച്ചയായാണ് ഇടവട്ടം ക്ഷീരസംഘത്തിലെ ഏറ്റുമുട്ടല്‍. ഇരുകക്ഷികളും തമ്മിലുള്ള സീറ്റ് ചര്‍ച്ചയില്‍ ധാരണയാകാത്തതാണ് മത്സരിക്കേണ്ടി വന്നതിന് കാരണമെന്ന് സിപിഎം പറയുന്നു.
പ്രതികരിക്കാൻ ഇവിടെ എഴുതുക: