തിരുവനന്തപുരം: സ്വര്ണക്കടത്തു കേസില് ആരോപണ വിധേയനായ മുഖ്യമന്ത്രിക്ക് പിന്തുണയുമായി വിദ്യാഭ്യാസ മന്ത്രി വി. ശിവന്കുട്ടി. കനല് വഴികളിലൂടെ നടന്നുവന്നയാളാണ് പിണറായി വിജയന്. പിണറായിവേട്ട ഇന്നും ഇന്നലെയും തുടങ്ങിയതല്ല. അദേഹത്തെ ഉമ്മാക്കി കാട്ടി പേടിപ്പിക്കാന് പ്രതിപക്ഷ പാര്ട്ടികള് ശ്രമിക്കേണ്ടതില്ലായെന്നും ശിവന്കുട്ടി പറഞ്ഞു.
വിദ്യാര്ഥി സംഘടനാ പ്രവര്ത്തന സമയത്തും എംഎല്എ ആയിരുന്നപ്പോള് പോലും ആ വേട്ട തുടര്ന്നു. കഴിഞ്ഞ നിയമസഭാ തെരഞ്ഞെടുപ്പ് കാലത്ത് ഉയര്ത്തിക്കൊണ്ട് വന്ന അതേ കാര്യങ്ങള് ആണ് ഇപ്പോള് പുതുതായി അവതരിപ്പിച്ചിരിക്കുന്നത്. ജനം തള്ളിക്കളഞ്ഞ ആരോപണങ്ങള് ആണ് അവ. ഇടതുപക്ഷ ജനാധിപത്യ മുന്നണിയുടെ ഭരണത്തുടര്ച്ചയില് അസൂയപൂണ്ട ശക്തികളാണ് ഇപ്പോഴുണ്ടാകുന്ന ആരോപണങ്ങള്ക്ക് പിന്നിലെന്നും വിദ്യാഭ്യാസ മന്ത്രി പറഞ്ഞു.
അഴിമതി എന്ന വാക്ക് പോലും സര്ക്കാര് തലത്തിലും ഉദ്യോഗസ്ഥ തലത്തിലും വച്ചു പൊറുപ്പിക്കില്ല. അഴിമതി മുക്ത കേരളം തന്നെയാണ് ലക്ഷ്യം. സംസ്ഥാനത്തിന്റെ ഭരണയന്ത്രം മെച്ചപ്പെട്ട നിലയില് പ്രവര്ത്തിക്കുമ്പോഴാണ് ഈ ആരോപണങ്ങള് ഒക്കെ ഉയരുന്നതെന്നും വ. ശിവന്കുട്ടി തിരുവനന്തപുരത്ത് പറഞ്ഞു.
