കൊച്ചി: ശബരിമല യുവതി പ്രവേശനവുമായി ബന്ധപ്പെട്ടുള്ള ഭക്തനപ്രതിഷേധങ്ങളില് ഹിന്ദു ഐക്യവേദി സംസ്ഥാന അധ്യക്ഷ കെ.പി.ശശികല, ശബരിമല കര്മ സമിതി ജനറല് കണ്വീനര് എസ്.ജെ.ആര്.കുമാര് എന്നിവര്ക്കെതിരെയുള്ള പോലീസ് നടപടി ഹൈക്കോടതി റദ്ദാക്കി. കണ്ണൂര് ടൗണ് പൊലീസ് റജിസ്റ്റര് ചെയ്ത കേസിലാണ് കോടതിയുടെ നടപടി. ശബരിമലയിലെ യുവതി പ്രവേശനവുമായി ബന്ധപ്പെട്ട വിഷയത്തില് ഹര്ത്താലിന് ആഹ്വാനം ചെയ്തെന്ന കാരണത്താല് ഹര്ത്താലിനിടെ ഉണ്ടായ അക്രമ സംഭവങ്ങളില് ഇവരെ പ്രതി ചേര്ത്തിരുന്നു.
പോലീസിന്റെ ആദ്യ എഫ്ഐആറില് ഇവരെ പ്രതിയാക്കിയില്ലെന്നും പിന്നീട് സംസ്ഥാന പോലീസ് മേധാവിയുടെ നിര്ദേശ പ്രകാരമാണ് പ്രതിചേര്ത്തതെന്നും ഹര്ജിക്കാരുടെ അഭിഭാഷകന് ചൂണ്ടിക്കാട്ടി. ഇത് കോടതിക്ക് വ്യക്തമായതോടെയാണ് ഇരുവര്ക്കുമെതിരെയുള്ള നിയമനടപടികള് റദ്ദാക്കാന് ജസ്റ്റിസ് എ.എ.സിയാദ് റഹ്മാന് ഉത്തരവിട്ടത്.
