ഇസ്ലാമാബാദ്: രാജ്യത്തെ ജനങ്ങള്‍ക്ക് വേണ്ടി സ്വന്തം വസ്ത്രം വിറ്റിട്ടായാലും ന്യായ വിലയ്ക്ക് ഗോതമ്പ് പൊടി എത്തിക്കുമെന്ന് പാകിസ്ഥാന് പ്രധാനമന്ത്രി ഷെഹബാസ് ഷെരീഫ്. ഗോതമ്പ് വില കുത്തനെ ഉയര്‍ത്തിയ ഖൈബര്‍ പഖ്ടുന്‍ഖ്വ സംസ്ഥാനത്തെ മുഖ്യമന്ത്രിയുടെ നടപടിയില്‍ അന്ത്യശാസനം നല്‍കിക്കൊണ്ടാണ് ഷെഹബാസ് ഷെരീഫ് ഇക്കാര്യം പറഞ്ഞത്. ഞായറാഴ്ച നടന്ന ഒരു പൊതുചടങ്ങില്‍ ജനങ്ങളെ അഭിസംബോധന ചെയ്ത് സംസാരിക്കവെയായിരുന്നു അദ്ദേഹം.
മുഖ്യമന്ത്രി മഹ്മൂദ് ഖാന്‍ 24 മണിക്കൂറിനുള്ളില്‍ 10 കിലോ ഗോതമ്പിലെ വില 400 രൂപയായി കുറയ്‌ക്കണം. ഇത് നടന്നില്ലെങ്കില്‍ സ്വന്തം വസ്ത്രമെടുത്ത് വില്‍ക്കുമെന്നും ആ പണം കൊണ്ട് ആളുകള്‍ക്ക് ഗോതമ്പ് വിലകുറച്ച് നല്‍കുമെന്നും പാക് പ്രധാനമന്ത്രി പറഞ്ഞു. പാകിസ്ഥാന്റെ മുന്‍ പ്രധാനമന്ത്രി ഇമ്രാന്‍ ഖാനെതിരെയും രൂക്ഷവിമര്‍ശനമുന്നയിച്ച് കൊണ്ടായിരുന്നു ഷെഹബാസ് ഷെരീഫിന്റെ പ്രസംഗം.
രാജ്യം കണ്ടതില്‍ വെച്ച് ഏറ്റവും വലിയ വിലക്കയറ്റവും തൊഴിലില്ലായ്മയുമാണ് ഇമ്രാന്‍ ഖാന്‍ പാകിസ്ഥാന് നല്‍കിയ സമ്മാനമെന്നാണ് ഷെഹബാസ് പറഞ്ഞത്. രാജ്യത്ത് ഇന്ധനവില കുതിച്ചുയരാന്‍ കാരണവും ഇമ്രാന്‍ ഖാനാണെന്ന് പ്രധാനമന്ത്രി പറഞ്ഞു. ലോകം മുഴുവന്‍ ഇന്ധനവില വര്‍ദ്ധിച്ചപ്പോള്‍ പാകിസ്താന്‍ മാത്രം വിലകുറിച്ചു. അതുകൊണ്ടാണ് ഇപ്പോള്‍ വില വര്‍ദ്ധിച്ചത് എന്നാണ് ഷെരീഫിന്റെ വാദം. ”ഞാന്‍ നിങ്ങളുടെ മുന്നില്‍ വെച്ച് പ്രഖ്യാപിക്കുകയാണ്, എന്റെ ജീവിതം ത്യജിച്ച് കൊണ്ടാണെങ്കിലും ഈ രാജ്യത്തെ ഞാന്‍ സമൃദ്ധിയിലേക്കും വികസനത്തിലേക്കും നയിക്കും,” ഷെഹബാസ് ഷെരീഫ് കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: