കൊച്ചി : പരസ്യ പ്രചാരണം അവസാനിക്കാന് നാല് ദിവസം മാത്രം ശേഷിക്കേ എതിരാളികള് സമൂഹ മാധ്യമങ്ങളിലൂടെ ആക്രമിക്കുകയാണെന്ന് ആരോപണവുമായി ജോ ജോസഫിന്റെ ഭാര്യ ഡോ. ദയ പാസ്കല്. തൃക്കാക്കര ഉപതെരഞ്ഞെടുപ്പില് ഡോ. ജോ ജോസഫിന്റെ സ്ഥാനാര്ത്ഥിത്വം പ്രഖ്യാപിക്കപ്പെട്ടത് മുതല് ക്രൂരമായ സൈബര് ആക്രമണമാണ് നേരിടുന്നതെന്നും അവര് മാധ്യമങ്ങളോട് പറഞ്ഞു.
എന്നോ എവിടെയോ കറങ്ങിക്കൊണ്ടിരുന്ന വ്യാജ വീഡിയോ എടുത്ത് അദ്ദേഹത്തിന്റെ പേരില് പ്രചരിപ്പിക്കുകയാണ്. തെരഞ്ഞെടുപ്പിന് ശേഷവും ജോ ജോസഫിന്റെ കുടുംബത്തിന് ജീവിക്കണ്ടേയെന്നും കുട്ടികള്ക്ക് പഠിക്കണ്ടേയെന്നും അവര് ചോദിച്ചു. ‘തൃക്കാക്കരയില് ഡോ. ജോ ജോസഫിന്റെ സ്ഥാനാര്ഥിത്വം പ്രഖ്യാപിക്കപ്പെട്ടത് മുതല് ക്രൂരമായ സൈബര് ആക്രമണമാണ് നേരിടുന്നത്.
അതിനൊന്നും വ്യക്തിപരമായി മറുപടി പറയണമെന്ന് കരുതിയിട്ടില്ല, അതിന് മെനക്കെട്ടിട്ടില്ല. അതിന് കാരണം തെരഞ്ഞെടുപ്പെന്നാല് വ്യക്തികള് തമ്മിലുള്ള ഏറ്റുമുട്ടലല്ല, നയങ്ങളും രാഷ്ട്രീയവും തമ്മില് വികസനം പറഞ്ഞ് മത്സരിക്കുന്ന ആരോഗ്യകരമായ മത്സരമായിരിക്കണമെന്ന് ചിന്തിച്ചിരുന്നത് കൊണ്ടാണ് പ്രതികരിക്കാതിരുന്നത്. പക്ഷ ഇപ്പോഴിത് എല്ലാ പരിധിയും വിടുന്ന അവസ്ഥയിലാണുള്ളത്.
എന്നോ എവിടെയോ കറങ്ങിയിരുന്ന ഒരു വ്യാജ വീഡിയോ ജോ ജോസഫിന്റേതാണെന്ന പേരില് പ്രചരിപ്പിക്കുകയാണ്. ഞങ്ങളുടെ കുട്ടികള്ക്ക് ഇനിയും പഠിക്കണ്ടേ? അവര്ക്കിനിയും സ്കൂളില് പോകണ്ടേ? തെരഞ്ഞെടുപ്പ് 31-ന് കഴിയും. അതില് ഒരാള് ജയിക്കുകയും മറ്റേയാള് തോല്ക്കുകയും ചെയ്യും. അതിന് ശേഷവും നമുക്കെല്ലാം ഈ നാട്ടില് ജീവിക്കാനുള്ളതല്ലേ. അദ്ദേഹത്തിനെതിരെ ക്രൂരമായ സൈബര് ആക്രമണമാണ് നേരിടുന്നത്. എല്ലാ പരിധികളും വിടുന്ന അവസ്ഥയാണ്. ആരോഗ്യകരമായ മത്സരമല്ലേ വേണ്ടതെന്നും ദയ പറഞ്ഞു. അതേസമയം സൈബര് ആക്രമണത്തോട് യോജിപ്പില്ലെന്നും വ്യാജ വീഡിയോക്ക് പിന്നില് പങ്കില്ലെന്ന് ബിജെപിയും യുഡിഎഫും വിഷയത്തില് പ്രതികരിച്ചു.
