നീലേശ്വരം: താലികെട്ട് കഴിഞ്ഞ് നേരെ കബഡി കോര്‍ട്ടിലേക്ക് കുതിച്ചെത്തി ടീമിനെ കിരീടത്തിലേക്ക് നയിച്ച് എകെജി ഓരിയുടെ വിച്ചു (വിഷ്ണു). കബഡിയുടെആവേശം അലതല്ലിയ ഓരി യംഗ് മെന്‍സ് കബഡി ടൂര്‍ണ്ണമെന്റിന്റെ താരമാവുകയും ടീമിനെ നിര്‍ണ്ണായക ഘട്ടത്തില്‍ വിജയക്കുതിപ്പിലേക്ക് നയിക്കുകയും ചെയ്ത വിഷ്ണുവിന്റെ പ്രകടനം നവവധുവിനുള്ള വിവാഹ സമ്മാനമായി.
വിഷ്ണുവിന്റെയും ഹര്‍ഷയുടെയും വിവാഹം കഴിഞ്ഞ ദിവസം വധു ഗൃഹത്തില്‍ വെച്ച് നടന്നു. താലികെട്ട് കഴിഞ്ഞ ഉടനെ വിഷ്ണു നേരെ കളിക്കളത്തിലേക്ക് എത്തുകയായിരുന്നു. ഓരി യംഗ് മെന്‍സ് അതിഥ്യമരുളിയ ഉത്തര മേഖലാ സീനിയര്‍ കബഡി ടൂര്‍ണമെന്റില്‍ ഫൈനലില്‍ പോരാട്ടത്തിന്റെ വീറും വാശിയും പ്രകടമായ മത്സരത്തില്‍ റെഡ് സ്റ്റാര്‍ കുറുന്തൂറിനെ തോല്‍പ്പിച്ച് എകെജി ഓരി കപ്പ് നേടുമ്പോള്‍ ഓരി സ്വദേശികളായ വിഷ്ണുവിന്റെയും ഹര്‍ഷയുടെയും ജീവിതത്തില്‍ ഈ ദിവസം ഇരട്ടി മധുരമായി.
ചെറുപ്രായത്തില്‍ കളിക്കളത്തിലെ മിന്നും താരമായിരുന്നു വിഷ്ണു. സിആര്‍പിഎഫ് ഉദ്യോഗസ്ഥനാണ്. ആതിഥേയരായ യംഗ് മെന്‍സ് ക്ലബ്ബ് കബഡി ഗ്രൗണ്ടില്‍ വെച്ച് നവദമ്പതികള്‍ക്ക് ഉപഹാരം നല്‍കിയതും കാണികളില്‍ വേറിട്ട അനുഭവമായി.
പ്രതികരിക്കാൻ ഇവിടെ എഴുതുക: