തിരുവനന്തപുരം: യുവമോര്‍ച്ച പ്രവര്‍ത്തകര്‍ കെ റെയില്‍ സര്‍വേകല്ല് സ്ഥാപിച്ച സംഭവത്തിനു പിന്നാലെ മുഖ്യമന്ത്രി പിണറായി വിജയന്റെ ഔദ്യോഗിക വസതിയായ ക്ലിഫ് ഹൗസില്‍ വന്‍ സുരക്ഷ ക്രമീകരണം. വന്‍ സുരക്ഷ ഒരുക്കുന്നതിന്റെ ഭാഗമായി 24 മണിക്കൂറും പ്രവര്‍ത്തിക്കുന്ന പൊലീസ് കണ്‍ട്രോള്‍ റൂം തുടങ്ങി. മെയിന്‍ ഗേറ്റിലെ പഴയ ഗാര്‍ഡ് റൂമിലാണ് സംവിധാനം. പുതിയ കെട്ടിടത്തിന്റെ നിര്‍മ്മാണം പൂര്‍ത്തിയായാലുടന്‍ അവിടേക്ക് മാറ്റും. കണ്‍ട്രോള്‍ റൂം അസി. കമ്മിഷണര്‍ക്കാണ് മേല്‍നോട്ടം. 65 പൊലീസുകാര്‍ ഷിഫ്റ്റ് അടിസ്ഥാനത്തില്‍ ഡ്യൂട്ടിക്കുണ്ടാകും. ക്ലിഫ് ഹൗസ് വളപ്പുള്‍പ്പെടെ ചുറ്റുവട്ടത്തെ 10 കിലോമീറ്ററോളം സ്ഥലമാണ് കണ്‍ട്രോള്‍ റൂം പരിധിയില്‍. ഈ ഭാഗത്തെ ഒന്‍പത് മന്ത്രി മന്ദിരങ്ങളുടെ വളപ്പുകളും കാമറ നിരീക്ഷണത്തിലാക്കി. 32 കാമറകളാണുള്ളത്. ദൃശ്യങ്ങള്‍ കണ്‍ട്രോള്‍ റൂമില്‍ നിരീക്ഷിക്കും. പുതിയ പിക്കറ്റ് പോസ്റ്റുകളും പട്രോളിംഗ് പോയിന്റുകളും സ്ഥാപിച്ചു. മന്ത്രി മന്ദിരങ്ങളില്‍ പിന്‍വശത്തുള്‍പ്പെടെ പൊലീസുകാരെ അധികമായി ഡ്യൂട്ടിക്ക് നിയോഗിച്ചു.
സുരക്ഷയ്‌ക്ക് സിഐഎസ്എഫ് കമാന്‍ഡോ സംഘത്തെ നിയമിച്ചതിന് പുറമേയാണ് സി.സി ടി.വി കാമറ സംവിധാനം ഉള്‍പ്പെടെയുള്ള കണ്‍ട്രോള്‍ റൂം നിരീക്ഷണവും. ഇതിനു പുറമേ ജീപ്പ്, ബൈക്ക് പട്രോളിംഗ് സംഘവും സദാസമയും പട്രോളിംഗ് നടത്തും. മ്യൂസിയം സ്‌റ്റേഷനിലെ ഒരു ജീപ്പും പതിവ് പട്രോളിംഗിനെത്തും. രണ്ട് ബൈക്ക് പട്രോളിംഗ് സംഘവും രണ്ട് പൊലീസുകാര്‍ വീതമുള്ള ഫുട് പട്രോളും ഉണ്ടാകും. അതീവ സുരക്ഷാ മേഖലയാണെന്ന വിലയിരുത്തലിലാണ് ക്ലിഫ് ഹൗസ് വളപ്പില്‍ കണ്‍ട്രോള്‍ റൂം പ്രവര്‍ത്തനം തുടങ്ങിയത്. എന്നാല്‍, ക്ലിഫ് ഹൗസില്‍ കടന്ന് ബിജെപി- യുവമോര്‍ച്ച പ്രവര്‍ത്തകര്‍ കെ റെയില്‍ കല്ല് സ്ഥാപിച്ചതില്‍ പിണറായി കടുത്ത അമര്‍ഷം രേഖപ്പെടുത്തിയതിനു പിന്നാലെയാണ് കണ്‍ട്രോള്‍ റൂം തുടങ്ങാന്‍ പോലീസ് തീരുമാനിച്ചത്.
പ്രതികരിക്കാൻ ഇവിടെ എഴുതുക: