കൊല്ലം: പാരിപ്പള്ളി ചിറക്കര ഗവ. ഹൈസ്കൂള് ജങ്ഷനിലെ വാഹന അപകടവുമായി ബന്ധപ്പെട്ടുണ്ടായ തര്ക്കത്തില് ക്രൈംബ്രാഞ്ച് ഇന്സ്പെക്ടര്ക്ക് പരിക്കേറ്റു. കൊല്ലം പരവൂര് സ്വദേശിയും തിരുവനന്തപുരം ക്രൈംബ്രാഞ്ച് ഇന്സ്പെക്ടറുമായ ബിജുവിനാണ് ആക്രമണത്തില് പരിക്കേറ്റത്.
ഞായറാഴ്ച വൈകുന്നേരം 3.30 നാണ് സംഭവം. ഇന്സ്പെക്ടര് സഞ്ചരിച്ചിരുന്ന സ്വകാര്യവാഹനത്തില് കാര് വന്നിടിച്ചത് ചോദ്യം ചെയ്യുകയും അത് സംഘര്ഷത്തിലേക്ക് എത്തുകയായിരുന്നു. തുടര്ന്ന് ബഹളംകേട്ട് സമീപത്തെ ബന്ധുവീട്ടിലുണ്ടായിരുന്ന കോണ്ഗ്രസ് നേതാവും നെടുവത്തൂര് ഗ്രാമപ്പഞ്ചായത്ത് അംഗവുമായ എന്. ജയചന്ദ്രനും പ്രദേശവാസികളുംകൂടി ഉദ്യോഗസ്ഥനെ രക്ഷപ്പെടുത്തി ബന്ധുവീടിന്റെ മതില്ക്കെട്ടിനുള്ളിലാക്കി. എന്നാല് അക്രമികള് വീണ്ടുമെത്തി ഉദ്യോഗസ്ഥനെ മര്ദ്ദിക്കുകയായിരുന്നു.
സ്ഥലത്തെത്തിയ പാരിപ്പള്ളി ഇന്സ്പെക്ടര് അല്ജബ്ബാര്, സബ് ഇന്സ്പെക്ടര് അനുരൂപ് എന്നിവരാണ് ക്രൈംബ്രാഞ്ച് ഉദ്യോഗസ്ഥനെ പാരിപ്പള്ളി മെഡിക്കല് കോളേജ് ആശുപത്രിയില് പ്രവേശിപ്പിച്ചത്. സംഭവത്തില് പരവൂര് പൂതക്കുളം എ.എന്.നിവാസില് മനു (33), കാര്ത്തികയില് രാജേഷ് (34), രാമമംഗലത്തില് പ്രദീഷ് (30) എന്നിവരെ പോലീസ് പിടികൂടി. ജാമ്യമില്ലാ വകുപ്പുപ്രകാരം കേസടുത്തു.
