ഓര്‍മ്മകള്‍ നഷ്ടപ്പെട്ട ഒരു അമ്മയുടെയും, അമ്മയെ സ്‌നേഹത്തോടെ, കരുതലോടെ ചേര്‍ത്തു നിര്‍ത്തുന്ന ഒരു മകന്റേയും സ്‌നേഹ ബന്ധത്തിന്റെ കഥ പറയുന്ന ഒറിഗാമി എന്ന ചിത്രത്തിന്റെ ചിത്രീകരണം പൂര്‍ത്തിയായി. ഏപ്രില്‍ 1-ന് ചിത്രം തീയേറ്ററിലെത്തും. പുഷ്‌കാസ് എന്റര്‍ടൈനേഴ്‌സിന്റ ബാനറില്‍, ബിനോയ് പട്ടിമറ്റം കഥ എഴുതി സംവിധാനം ചെയ്യുന്നു. സംവിധായകന്‍ ബിനോയ് പട്ടിമറ്റം തന്റെ സ്വന്തം ജീവിത കഥ തന്നെ സിനിമയാക്കുകയായിരുന്നു. തന്റെയും, അമ്മയുടെയും ജീവിത കഥ. മലയാളത്തില്‍ ആദ്യമാണ് ഒരു സംവിധായകന്‍ സ്വന്തം ജീവിത കഥ സിനിമയാക്കുന്നത്. അതു കൊണ്ട് തന്നെ ഒറിഗാമി പ്രേക്ഷകന് പുതിയൊരു അനുഭവമായിരിക്കും.
വാര്‍ധക്യം പ്രകൃതി സഹജമായ ഒരു അവസ്ഥയാണ്. വാര്‍ധക്യത്തിന്‍, ശാഠ്യങ്ങളും, ദുശ്ശാഠ്യങ്ങളും കൂടി വരും. മനുഷ്യന് പ്രായമാകുമ്പോള്‍, മനസിന് പ്രായം കുറയുന്നു. ഈ അവസ്ഥയില്‍ ചിലപ്പോള്‍ ഓര്‍മ്മകള്‍ പോലും നഷ്ടപ്പെടുന്നു. അപ്പോള്‍ അവരുടെ പ്രവൃത്തികളോ, വാക്കുകളോ മറ്റുള്ളവര്‍ക്ക് അരോചകമായി തീരുന്നു. വേറിട്ട വ്യക്തിത്വമായി മാറുന്ന ഇവര്‍ ഇന്നത്തെ തലമുറയ്‌ക്ക്, ശാപവും, അതിലേറെ ഭാരവുമായി മാറുന്നു. അതോടെ ഇവരെ മക്കള്‍, മരണം വരെ വൃദ്ധസദനങ്ങളിലും, ഭ്രാന്താശുപത്രികളിലും കൊണ്ട് പോയി തള്ളുന്നു.
ഓര്‍മ്മകള്‍ നഷ്ടപ്പെടുന്ന മാതാപിതാക്കളുടെ ദയനീയ അവസ്ഥ മനസിലാക്കാതെ, സ്വയം അഹങ്കരിച്ച് നടക്കുന്ന പുതിയ തലമുറയ്‌ക്കുള്ള താക്കീതാണ് ഒറിഗാമി എന്ന ചിത്രം. വാര്‍ധക്യം, വഴിയില്‍ ഉപേക്ഷിക്കാനുള്ളതല്ലെന്നും, അവരെ ചേര്‍ത്ത് നിര്‍ത്തി സംരക്ഷിക്കാനുള്ളത് കൂടിയാണെന്നും ഉള്ള സന്ദേശം കൂടി നല്‍കുകയാണ് ഒറിഗാമി എന്ന ചിത്രം.
പുഷ്‌കാസ് എന്റര്‍ടൈനേഴ്‌സിന്റെ ബാനറില്‍, കെ.മുരളീധരന്‍, ബീനാ കാവേരി എന്നിവര്‍ ചേര്‍ന്ന് നിര്‍മ്മിക്കുന്ന ഒറിഗാമി, ബിനോയ് പട്ടിമറ്റം കഥ എഴുതി സംവിധാനം ചെയ്യുന്നു. തിരക്കഥ- ആചാരി ഗോവിന്ദ് രാജ്, ക്യാമറ- വിപിന്‍ രാജ്, ഗാനരചന- അടൂര്‍ മണിക്കുട്ടന്‍, രതീഷ് മന്മഥന്‍, സംഗീതം- സുരേഷ് നന്ദന്‍, കെ.എസ്. സജീവ് കുമാര്‍, ആലാപനം- നജീം അര്‍ഷാദ്, ജിജോ മാത്യു, എഡിറ്റിംഗ്- കപില്‍ കൃഷ്ണ, പിആര്‍ഒ- അയ്മനം സാജന്‍.
സന്തോഷ് കീഴാറ്റൂര്‍, ശിവജി ഗുരുവായൂര്‍, ജയിംസ് പാറയ്‌ക്കല്‍, ബീനാ കാവേരി ,അജയ്, റിനോണ്‍ രാജന്‍, കെ മുരളീധരന്‍, കൈലാസ് കലഞ്ഞൂര്‍, നാന്‍സി, വൈഗ, ശോഭന ബാലചന്ദ്രന്‍ ,മാസ്റ്റര്‍ വിശാല്‍ എന്നിവര്‍ അഭിനയിക്കുന്നു.
പ്രതികരിക്കാൻ ഇവിടെ എഴുതുക: