കൊച്ചി: സിനിമാ വിതരണക്കാരുടെ സംഘടനയായ ഫിയോക്കില് താന് അംഗമല്ലെന്ന് ആന്റണി പെരുമ്പാവൂര്. സംഘടനയില് നിന്നും ആന്റണിയെ പുറത്താക്കുമെന്ന വാര്ത്ത പുറത്തുവന്നതിന് പിന്നാലെയാണ് പ്രതികരണം. താന് അംഗമല്ലാത്ത സംഘടനയില് നിന്നും തന്നെ എന്തിനാണ് പുറത്താക്കുന്നതെന്ന് അറിയില്ലായെന്നും ആന്റണി പ്രതികരിച്ചു.
ദിലീപിനെയും ആന്റണി പെരുമ്പാവൂരിനെയും പുറത്താക്കി ഫിയോക് ഭരണഘടന ഭേദഗതി നടപ്പിലാക്കാനാണ് പ്രസിഡന്റ് വിജയകുമാറിന്റെ നേതൃത്വത്തിലുള്ള സംഘടനയുടെ തീരുമാനം. വിഷയത്തിലെ അന്തിമതീരുമാനം 31ന് നടക്കുന്ന ജനറല് ബോഡി യോഗത്തിലുണ്ടാകും. ഒ.ടി.ടി റിലീസ് സംബന്ധിച്ച അഭിപ്രായഭിന്നതകളെ തുടര്ന്നാണ് ഇരുവരെയും പുറത്താക്കാനുള്ള നീക്കം സംഘടനക്കുള്ളില് നടക്കുന്നത്.
നിലവിലുള്ള ഫിയോക് ഭരണഘടന ഭേദഗതിയില് മാറ്റം വരുത്തിയാല് ദിലീപിനെയും ,ആന്റണി പെരുമ്പാവൂരിനെയും പുറത്താക്കാന് കഴിയും. പിന്നെ ചെയര്മാന്, വൈസ് ചെയര്മാന് സ്ഥാനങ്ങള് തിയേറ്റര് ഉടമകള്ക്ക് മാത്രമേ ലഭ്യമാകൂ.
