തിരുവനന്തപുരം: കൃത്രിമരേഖകള് ഉണ്ടാക്കി വാഹന ഇന്ഷുറന്സ് തട്ടിയെടുത്ത കേസില് അഞ്ച് പോലീസുകാരും ഒരു അഭിഭാഷകനും ഉള്പ്പെടെ 26 പേരെ പ്രതിചേര്ത്തു. വിദേശത്തും തമിഴ്നാട്ടിലും നടന്ന അപകടങ്ങള് തിരുവനന്തപുരം ജില്ലയിലെ വിവിധ ഭാഗങ്ങളില് നടന്നുവെന്ന് എഫ്ഐആറുണ്ടാക്കി കോടികള് തട്ടാന് ശ്രമം നടത്തിയെന്നാണ് ക്രൈംബ്രാഞ്ച് കണ്ടെത്തല്. അഞ്ചു കേസുകളിലാണ് ഇരുപത്തിയാറു പേരെ പ്രതി ചേര്ത്തത്. പോലീസും അഭിഭാഷകരും മോട്ടോര് വാഹന വകുപ്പ് ഉദ്യോഗസ്ഥരും ചേര്ന്ന് വന് കൊള്ളയാണ് നടത്തിയത്.
മ്യൂസിയം പോലീസ് രജിസ്റ്റര് ചെയ്തിരിക്കുന്ന ഒരു വാഹന അപകട എഫ്ഐആറില് പ്രതി ഓട്ടോ ഡ്രൈവറായ സുരേഷ് കുമാറാണ്. മ്യൂസിയം ഭാഗത്ത് നിന്നും നന്തന്കോട് ഭാഗത്തേക്ക് അമിത വേഗത്തില് സുരേഷ് ഓടിച്ച വാഹനമിടിച്ച് തമിഴ്നാട് സ്വദേശി രാജനെന്നയാള്ക്ക് ഗുരുതരമായി പരിക്കേറ്റുവെന്നാണ് എഫ്ഐആര്. രാജന് ശരിക്കും അപകടം സംഭവിച്ചിരുന്നു. എന്നാല് അത് 2018 ആഗസ്ത് 18ന് തമിഴ്നാട്ടിലെ പാലൂരില് വെച്ചാണ്.
സംഭവത്തിന് കേസെടുത്ത് 2019 ജനുവരി ഏഴിനാണ്. അതേമാസം 10ന് ഓട്ടോയുടെ വലതു വശത്ത് അപകടമുണ്ടായതില് വാഹനത്തിന് തകരാറുണ്ടെന്ന് മോട്ടോര് വാഹന വകുപ്പ് ഉേദ്യാഗസ്ഥര് റിപ്പോര്ട്ടും നല്കി. തിരുവനന്തപുരം എംഎസിടി കോടതിയില് 12 ലക്ഷം നഷ്ടപരിഹാരം ആവശ്യപ്പെട്ട് രാജന് കേസ് നല്കി. അപകടം നടന്ന് നാലു മാസത്തിനുശേഷം കേസെടുത്തതും വാഹനത്തിന്റെ കേടുപാടുകള് നാലുമാസമായി പരിഹരിക്കാത്തതുമാണ് ക്രൈംബ്രാഞ്ചിന്റെ സംശയത്തിനിടയാക്കിയത്. തുടര്ന്ന് നടത്തിയ അന്വേഷണത്തില് മ്യൂസിയം ഭാഗത്ത് രാജനുണ്ടായ അപകടം വ്യാജമാണെന്നാണ് കണ്ടെത്തിയത്.
ഇടനിലക്കാരും അഭിഭാഷകരും പോലീസുമെല്ലാം ഒത്തുകളിച്ച് തിരുവനന്തപുരത്ത് കള്ളക്കേസുണ്ടാക്കിയെന്നാണ് കണ്ടെത്തല്. ആശുപത്രിയിലുണ്ടായിരുന്ന രാജനെ ഇന്ഷുറസ് തുക തട്ടിച്ചെടുക്കുന്ന ലോബി സ്വാധീനിക്കുകയായിരുന്നു. വിദേശത്ത് വച്ച് പരിക്കേറ്റ സംഭവം കേരളത്തിലാണെന്ന് വ്യാജരേഖയുണ്ടാക്കിയും ഇന്ഷുറന്സ് തുക തട്ടാന് ശ്രമം ഉണ്ടായെന്ന് കണ്ടെത്തിയിട്ടുണ്ട്.
